न्युयोर्कमा नेपाली–अमेरिकन व्यापार तथा लगानी सम्मेलन हुँदै

काठमाडौं । नेपाल र अमेरिकाबीच व्यापार, लगानी तथा आर्थिक सहकार्य विस्तार गर्ने उद्देश्यले आगामी सेप्टेम्बरमा अमेरिकाको न्युयोर्कमा ‘नेपाली अमेरिकन बिजनेस एण्ड इन्भेष्टमेन्ट समिट (नबिस) २०२६’ आयोजना हुने भएको छ । ग्रेटर न्युयोर्क नेपाली चेम्बर अफ कमर्सले सम्मेलनको घोषणा गर्दै सेप्टेम्बर २५ देखि २७ सम्म न्युयोर्कस्थित जेएफके मेरियट होटलमा तीनदिने सम्मेलन हुने जनाएको छ । न्युयोर्कस्थित नेपाली महावाणिज्यदूतावासको सहयोगमा आयोजना हुने सम्मेलनको नारा ‘कनेक्टिङ क्यापिटल, आइडियाज एण्ड अपर्चुनिटिज’ राखिएको छ । चेम्बरका अध्यक्ष प्रदीप श्रेष्ठले सम्मेलनले नेपाल र अमेरिकाबीच आर्थिक सम्बन्धलाई नयाँ उचाइमा पु¥याउन सहयोग गर्ने बताए । सम्मेलनमा दुवै देशका सरकारी प्रतिनिधि, व्यवसायी, लगानीकर्ता, उद्यमी, नीति निर्माता तथा नेपाली डायस्पोराको सहभागिता रहने जनाइएको छ ।

उनले नेपालमा पर्यटन, जलविद्युत्, सूचना प्रविधि, कृषि, पूर्वाधार, उत्पादनमूलक उद्योग तथा स्टार्टअप क्षेत्रमा लगानीका पर्याप्त सम्भावना रहेको बताए । अमेरिकामा रहेका नेपाली मूलका व्यवसायीको ज्ञान, अनुभव र पुँजीलाई नेपालको आर्थिक विकाससँग जोड्ने उद्देश्यले सम्मेलन आयोजना गर्न लागिएको उनको भनाइ छ । सम्मेलनमा नेपालका लगानी सम्भावना, अन्तर्राष्ट्रिय व्यापार, प्रविधि, कृत्रिम बुद्धिमत्ता (एआई), स्टार्टअप प्रवद्र्धन तथा अन्तर्राष्ट्रिय साझेदारीका विषयमा छलफल हुनेछ ।

साथै, स्टार्टअप शोकेस, लगानीकर्ता नेटवर्किङ, व्यवसाय–व्यवसाय तथा व्यवसाय–सरकारबीच भेटघाटलगायत कार्यक्रम पनि आयोजना गरिने आयोजकले जनाएको छ । संयुक्त राष्ट्रसंघ (यूएन) महासभाको उच्चस्तरीय सप्ताह तथा ‘क्लाइमेट विक एनवाइसी’सँगै सम्मेलन आयोजना हुने भएकाले विश्वभरका नीति निर्माता, लगानीकर्ता र व्यावसायिक नेतृत्वसँग प्रत्यक्ष सम्पर्क विस्तार गर्ने अवसर मिल्ने आयोजकको विश्वास छ ।