पूर्वअर्थमन्त्री पौडेलविरुद्ध विशेषमा मुद्दा दायर

काठमाडौं । पूर्वअर्थमन्त्री एवम् एमालेका उपाध्यक्ष विष्णुप्रसाद पौडेलविरुद्ध २० करोड ९० लाखको सम्पत्ति शुद्धीकरण मुद्दा दायर भएको छ । विवादास्पद व्यवसायी दीपक भट्टको सम्पत्ति शुद्धीरणसम्बन्धी काममा संलग्न रही मतियारको भूमिका खेलेको आरोप पौडेलमाथि लगाइएको छ । 
सम्पत्ति शुद्धीकरण अनुसन्धान विभागले पौडेललगायत १६ जनाविरुद्ध बिहीबार विशेष अदालतमा मुद्दा दायर गरेको हो । अदालतका अनुसार पौडेलमाथि २० करोड ९० लाख रुपैयाँ सम्पत्ति शुद्धीकरण गरेको आरोप छ । विभागले पौडेलको बैंक खातामा भएको ६ लाख ३४ हजार रुपैयाँ जफत गर्न समेत मागदाबी गरेको छ । 
अभियोग पत्रअनुसार पौडेलले श्रीराम टोबाको उद्योगको २० प्रतिशत सेयर अर्थात् ३ लाख ७५ हजार कित्ता न्यून मूल्यमा दीपक भट्टको कम्पनीलाई दिलाउन सहजीकरण गरेका थिए । कम्पनीको प्रतिसेयर किताबी मूल्य ८१६ रुपैयाँ ७१ पैसा रहे पनि प्रतिसेयर १०० रुपैयाँका दरले भट्टको कम्पनीलाई सेयर हस्तान्तरण गरिएको थियो । यसको बदलामा पौडेलले सुपारी आयातमा सहुलियत दिलाएको, राजस्व अनुसन्धान विभागको कारबाहीबाट जोगाएको र हिमालयन रि–इन्स्योरेन्सलाई इजाजत दिलाउन भूमिका खेलेको आरोपपत्रमा दाबी गरिएको छ । 
 विभागको अनुसन्धान प्रतिवेदनको आधारमा विशेष सरकारी वकिल कार्यालयले पौडेलसहित १६ विरुद्ध मुद्दा दायर गरेको हो । जसअनुसार भट्टलाई ४७ करोड ७७ लाख ६६ हजार २५० रुपैयाँ बिगो दाबी गरिउको छ । त्यस्तै, सुभी अग्रवाललाई १३ करोड ३३ लाख ५६ हजार १३६ रुपैयाँ, हिमालयन एसेट म्यानेजमेन्टलाई २० करोड ९० लाख रुपैयाँ बिगो माग दाबी गरिएको छ । 
त्यस्तै, अर्का विवादित व्यवसायी सुलभ अग्रवालको नाममा रहेको बालुवाटारको घर–जग्गा, रिद्धिसिद्धि सिमेन्टको १ करोड ७० लाख कित्ता सेयर, र दीपक भट्टको नाममा रहेका विभिन्न ८ वटा कम्पनीका १५६ रोपनी जग्गा जफत गर्न माग गरिएको छ । 
मुख्य प्रतिवादी भट्टले ‘इन्फिनिटी होल्डिङ्स’ र ‘हिमालयन एसेट म्यानेजमेन्ट’मार्फत अवैध सम्पत्ति शुद्धीकरण गरेको अनुसन्धानले देखाएको छ । भट्टले जगदम्बा स्टिलबाट प्राप्त ४५ करोड रुपैयाँलाई स्रोत नखुलाई हिमालयन रि–इन्स्योरेन्समा लगानी गरेको र ललितपुरको लामाटार लगायतका स्थानमा १५६ रोपनीभन्दा बढी जग्गा कम्पनीका नाममा खरिद गरी स्रोत लुकाएको पाइएको छ । 
प्रतिवादी सुभी अग्रवालले कसुरबाट प्राप्त १३ करोड ३३ लाख रुपैयाँभन्दा बढी रकमलाई सहकारीमार्फत शुद्धीकरण गरेको आरोप छ । उनले जगदम्बा स्टिलका कामदार उपेश बस्नेतलाई प्रयोग गरी ‘प्रतिभा बहुउद्देश्यीय सहकारी’, ‘कमल बहुउद्देश्यीय सहकारी’ र ‘नेचुरल बचत तथा ऋण सहकारी’मा रकम जम्मा गर्ने र झिक्ने गरेको आरोपपत्रमा उल्लेख छ । १० लाखभन्दा कमको सीमामा रहेर पटक–पटक रकम जम्मा गरी बैंकको नियमन छल्ने प्रयास गरिएको असुन्धानमा देखिएको छ । 
यस प्रकरणमा श्रीराम टोबाको उद्योगका सञ्चालकहरू चुन्नुप्रसाद शर्मा र कमलकिशोर मालपानीलाई भने सरकारी साक्षीका रूपमा प्रस्तुत गरिएको छ । उनीहरूले पौडेलकै दबाब र सहजीकरणमा भट्टलाई सेयर दिएको स्वीकार गर्दै अनुसन्धानमा सहयोग गरेको भन्दै उनीहरूलाई सजायमा छुट दिइएको छ । शर्मा र मालपानीकै बयानका आधारमा प्रहरीले पौडेललाई पक्राउ गरेको थियो । 
पूर्व अर्थमन्त्री पौडेल सम्पत्ति शुद्धीकरण मुद्दाको अनुसन्धानका क्रममा हाल न्यायिक हिरासतमा छन् । असार ८ गते सुर्खेतबाट पक्राउ गरेर ल्याइएका पौडेललाई थुनामा राख्न सोमबार छैटौं पटक ३ दिनको लागि म्याद थप गरिएको छ । पौडेललाई पक्राउ गरिएको २४ दिनपछि मुद्दा दायर गरिएको हो । विवादित व्यवसायी भट्ट र सुलभ अग्रवाल पनि पुर्पक्षका लागि थुनामा छन् । सम्पत्ति जफत प्रयोजनार्थ भट्ट, ऋषिराज मोर, सुलभ अग्रवाल, शुभी अग्रवाल, उपेश बस्नेतविरुद्ध पूरक मुद्दा दायर भएको छ । यसअघि २८ जेठमा भट्टसहितलाई सम्पत्ति शुद्धीकरण मुद्दा दायर भएको थियो ।