एनआईसी एशिया बैंकद्वारा सुर्खेत र दाङका विद्यालयमा शैक्षिक सामग्री सहयोग

काठमाडौं ।  एनआईसी एशिया बैंकले संस्थागत सामाजिक उत्तरदायित्व (सीएसआर)अन्तर्गत सुर्खेत र दाङका दुई सामुदायिक विद्यालयका विद्यार्थीलाई विद्यालय पोशाक, झोला तथा शैक्षिक सामग्री सहयोग गरेको छ । बैंकले वीरेन्द्रनगर–८, सुर्खेतस्थित श्री सिद्ध बहिरा बालकको स्कुल र घोराही उपमहानगरपालिका–१८, दाङस्थित श्री आधारभूत विद्यालय गिठेपानीमा अध्ययनरत विद्यार्थीको पठनपाठनलाई सहज बनाउन सहयोग उपलब्ध गराएको जनाएको छ ।

सुर्खेतस्थित श्री सिद्ध बहिरा बालकको स्कुलमा अध्ययनरत ११५ जना फरक क्षमता भएका विद्यार्थीका लागि ११५ थान विद्यालय पोशाक प्रदान गरिएको छ । उक्त सामग्री बैंकका कर्णाली सर्कल हेड जीवन शाहीले विद्यालयका प्रधानाध्यापक चिन्तामणि कँडेललाई हस्तान्तरण गरेका थिए । त्यसैगरी, २७७ भन्दा बढी विद्यार्थी अध्ययनरत दाङको श्री आधारभूत विद्यालय गिठेपानीमा विद्यालय पोसाक, झोला तथा विभिन्न शैक्षिक सामग्री उपलब्ध गराइएको छ ।

बैंकका घोराही सर्कल हेड विनोद प्रसाद जैसीले विद्यालयका प्रधानाध्यापक गिरीप्रसाद भट्टराईलाई सामग्री हस्तान्तरण गरेका हुन् । सहयोग हस्तान्तरण कार्यक्रममा विद्यालयका शिक्षक, विद्यार्थी तथा बैंकका कर्मचारीको सहभागिता रहेको थियो । बैंकका अनुसार फरक क्षमता भएका विद्यार्थीलाई उपलब्ध गराइएको विद्यालय पोशाकले उनीहरूको पठनपाठनमा सहजता ल्याउने तथा दाङस्थित विद्यालयलाई प्रदान गरिएको शैक्षिक सामग्रीले गुणस्तरीय शिक्षण–सिकाइ वातावरण निर्माणमा योगदान पुग्ने अपेक्षा गरिएको छ ।