स्वदेशी जुत्ताचप्पल उद्योग प्रवर्द्धनमा बालेनको प्रतिबद्धता

न्यूज २४ दैनिक

शनिबार, साउन २, २०८३ १५:३८

स्वदेशी जुत्ताचप्पल उद्योग प्रवर्द्धनमा बालेनको प्रतिबद्धता

काठमाडौँ । प्रधानमन्त्री वालेन्द्र शाह (बालेन) ले स्वदेशी जुत्ताचप्पल उद्योगको प्रवद्र्धन गर्ने प्रतिबद्धता व्यक्त गरेका छन् ।

प्रधानमन्त्री तथा मन्त्रिपरिषद्को कार्यालयमा शुक्रबार फुटवेयर म्यानुफ्याक्चरर्स एसोसिएसन अफ नेपाल (एफएमएएन) का पदाधिकारी तथा सदस्यहरूको छलफलमा उनले सरकारले नेपाली जुत्ता–चप्पलको ब्रान्डिङ, मार्केटिङ तथा बजार प्रवर्द्धन गर्ने प्रतिबद्धता व्यक्त गरे । साे भेटमा उनले निजी क्षेत्रलाई प्रोत्साहन गरिने बताए ।

उनले स्वदेशी जुत्ताचप्पल उद्योगको प्रवर्द्धन, आयात प्रतिस्थापन, रोजगारी सिर्जना तथा निर्यात प्रवर्द्धनका लागि सरकारले आवश्यक नीतिगत तथा संस्थागत सहजीकरण गर्ने प्रतिबद्धता व्यक्त गरे। उनले तीनै तहको सरकारको समन्वयमा जुत्ता निर्माणसम्बन्धी सीपमूलक तालिम सञ्चालन गरिने बताए।

यस्तै उद्योगको उत्पादन क्षमताअनुसार कच्चा पदार्थ आयातको सीमामा ट्र्याकिङ तथा अभिलेख व्यवस्थापन प्रभावकारी बनाइने र स्वदेशी उत्पादनको प्रयोग, प्रवर्द्धन तथा बजार विस्तारमा उनले विशेष जोड दिइने बताए ।

छलफलमा संघका पदाधिकारी तथा सदस्यले भारतका विभिन्न नाकाबाट हुने अवैध चोरी पैठारी नियन्त्रण गर्न, कर तथा भ्याटको दायराबाहिर रहेका अन्तर्राष्ट्रिय तथा राष्ट्रिय ब्रान्डलाई कानुनी दायरामा ल्याउन, गुणस्तरहीन तथा सस्तो जुत्ताचप्पलको आयात नियन्त्रण गर्ने तथा आयातित जुत्ताचप्पलमा अनिवार्य गुणस्तर परीक्षण लागू गर्न सरकारलाई आग्रह गरे ।

साथै उनीहरूले सरकारबाट आवश्यक नीतिगत सहयोग, बजार संरक्षण र उद्योगमैत्री व्यवस्था भए स्वदेशी जुत्ताचप्पल उद्योग पूर्ण क्षमतामा सञ्चालन गर्ने बताए ।

सो छलफलमा संघका अध्यक्ष सुरज बन्जाडे, निवर्तमान अध्यक्ष रुद्र न्यौपाने, महासचिव निर्मल भट्टराई, सल्लाहकार कालिदास गौतम, सदस्य एवं प्रतिनिधिसभा सदस्य विदुषी राणालगायतको उपस्थिति रहेकाे थियो ।

प्रकाशित मिति: शनिबार, साउन २, २०८३ १५:३८

प्रतिक्रिया दिनुहोस्