औद्योगिक क्षेत्रका उद्योगबाट ४६ करोड महसुल असुल

काठमाडौं । उद्योगीहरूले औद्योगिक क्षेत्रका भौतिक संरचना प्रयोग गरेबापत राज्यकोषमा ४६ करोड ८६ लाख रुपैयाँ महसुल दाखिला गरेका छन् । उद्योगीहरूले गत आर्थिक वर्षको साउनदेखि असार मसान्तसम्मको अवधिमा यति राजस्व दाखिला गरेका हुन् ।
औद्योगिक क्षेत्र व्यवस्थापन लिमिटेडका अनुसार देशभरका विभिन्न १० औद्योगिक क्षेत्रमा सञ्चालित उद्योगबाट यो रकम असुल गरिएको हो । औद्योगिक क्षेत्र व्यवस्थापन लिमिटेडका सूचना अधिकारी वासुदेव सोडारीका अनुसार औद्योगिक क्षेत्रभित्र सञ्चालनमा रहेका उद्योगहरूबाट बक्यौता असुली अभियानलाई तीव्र बनाइएपछि उल्लेख्य रकम राज्यकोषमा जम्मा भएको हो । 
८८ करोड रुपैयाँ उठ्न बाँकी 
केही उद्योगले औद्योगिक क्षेत्रका भौतिक संरचना प्रयोग गरेबापत राज्यकोषमा महसुलबापतको रकम दाखिला गरेपनि देशभरका औद्योगिक क्षेत्रमा सञ्चालित ३०० भन्दा बढी उद्योगले अझै महसुल तिर्न अटेर गरेका छन् । यी उद्योगले करिब ८८ करोड रुपैयाँ महसुल राज्यलाई तिर्न बाँकी रहेको औद्योगिक क्षेत्र व्यवस्थापन लिमिटेडले जनाएको छ । लामो समयदेखि बक्यौता नतिर्ने उद्योगहरूलाई कानुनी प्रक्रिया अघि बढाएर महसुल असुलीलाई प्रभावकारी बनाउने तयारी गरिएको छ । बक्यौता नबुझाउने उद्योगमाथि कडाइ गर्दै हालसम्म १० उद्योगको विद्युत् आपूर्ति विच्छेद गरिएको छ । पटक–पटक ताकेता गर्दा पनि महसुल नतिरेपछि विद्युत् लाइन काटिएको सूचना अधिकारी सोडारीले बताए । सोडारीका अनुसार कन्टिनेन्टल समूहअन्तर्गतका २ उद्योगले मात्रै करिब ४ करोड रुपैयाँ महसुल तिर्न बाँकी रहेको छ । औद्योगिक क्षेत्र व्यवस्थापन लिमिटेडले बक्यौता असुलीलाई अझ प्रभावकारी बनाउँदै समयमै महसुल नतिर्ने उद्योगविरुद्ध आवश्यक कानुनी तथा प्रशासनिक कारबाहीलाई निरन्तरता दिने जनाएको छ । उद्योगीहरूलाई समयमै दायित्व पूरा गर्न आग्रह गर्दै औद्योगिक क्षेत्र व्यवस्थापन लिमिटेडले औद्योगिक क्षेत्रको पूर्वाधार सञ्चालन तथा व्यवस्थापनका लागि नियमित महसुल संकलन आवश्यक रहेको जनाएको छ ।