कफीको क्याफिन स्वास्थ्यका लागि सुरक्षित

क्याफिन स्वास्थ्यका लागि राम्रो हो वा नराम्रो भन्ने बारेमा आउने स्वास्थ्य सल्लाहहरू बुझिराख्न कहिलेकाहीँ गाह्रो हुन सक्छ तर अमेरिकाका मुटु रोग विशेषज्ञहरूले यो बहसलाई टुङ्ग्याउने प्रयास गर्दै दिनमा पाँच कपसम्म कफी पिउनु पूर्ण रूपमा सुरक्षित हुने र यसले हृदयघातको जोखिमसमेत कम गर्न सक्ने निर्देशिका जारी गरेका छन् ।
अमेरिकन हार्ट एसोसिएसनको भनाइअनुसार दिनमा दुईदेखि चार कप कफी पिउँदा मुटु रोग, मधुमेह (सुगर), हार्ट फेलियर र स्ट्रोक (पक्षघात) को जोखिम कम हुन्छ ।
अनुसन्धानकर्ताहरूले पुराना दर्जनौं अध्ययनहरूको तथ्याङ्क विश्लेषण गर्दै दिनमा ४०० मिलिग्रामसम्म कफी पिउनु “धेरैजसो वयस्कहरूको लागि सामान्यतया सुरक्षित रहेको र यसले मुटुसम्बन्धी विभिन्न समस्याहरूको जोखिम कम गर्न सक्ने” पत्ता लगाएका छन् । एक कप कफीमा करिब ८० देखि १०० मिलिग्राम क्याफिन हुन्छ, चियामा करिब ५० मिलिग्राम, एक क्यान कोका–कोलामा ३३ मिलिग्राम र एक क्यान रेडबुलमा ८० मिलिग्राम क्याफिन हुन्छ ।
‘सर्कुलेसन’ नामक पत्रिकामा प्रकाशित सो अनुसन्धान पत्रमा कफीमा सुन्निने समस्या (इन्फ्लामेसन) कम गर्न र पेटका राम्रा ब्याक्टेरियाहरू बढाउन मद्दत गर्ने तत्त्वहरू हुने बताइएको छ । तर, अनुसन्धानकर्ताहरूले मानिसहरूलाई एनर्जी ड्रिंक र बार जस्ता अन्य स्रोतहरूबाट पाइने क्याफिनप्रति भने होसियार रहन आग्रह गरेका छन् किनभने यी कुराहरू स्वास्थ्यका लागि राम्रो हुन्छन् भन्ने प्रमाण धेरै छैनन् । उनीहरूका अनुसार एनर्जी ड्रिंकमा हुने उच्च क्याफिनले “उच्च रक्तचाप (हाइ ब्लड प्रेसर) र मुटुको धड्कन अनियमित हुने जोखिम बढाउन सक्छ  ।”
अनुसन्धानकर्ताहरूले कफीमा दूध, चिनी, क्रिम वा सिरप मिसाउँदा यसबाट पाइने स्वास्थ्य लाभ कम हुन सक्ने भन्दै सचेत पनि गराएका छन् । ठिक्क मात्रामा क्याफिन पिउँदा स्वास्थ्यलाई फाइदा पुग्न सक्छ, तर दिनमा ४०० मिलिग्रामभन्दा बढी क्याफिन लिँदा यसले चिन्ता (एन्जाइटी), मुटुको धड्कन बढ्ने, निद्रा नलाग्ने र उच्च रक्तचापको समस्या ल्याउन सक्छ । गत हप्ता सरकारले बेलयातमा बालबालिकालाई एनर्जी ड्रिंक बेच्न प्रतिबन्ध लगाउने घोषणा गरेको थियो ।
यस अध्ययनका एक लेखक तथा युनिभर्सिटी अफ क्यालिफोर्नियाका प्राध्यापक ग्रेगरी मार्कसले भने, “कफीमार्फत लिइने क्याफिन लाखौं मानिसहरूको दैनिक जीवनको प्रमुख हिस्सा हो । हाम्रा पछिल्ला अनुसन्धानहरूको समीक्षाअनुसार, धेरैजसो वयस्कहरूको लागि दिनमा ४०० मिलिग्रामसम्म क्याफिन लिनु सुरक्षित छ र यसले मुटुको जोखिम बढाउँदैन । यो भनेको चिनी वा अन्य कुरा नमिसाएको दिनको पाँच कप कफी बराबर हो । तर, एनर्जी ड्रिंकहरूमा पाइने जस्तो उच्च मात्राको क्याफिनले मुटुमा हानिकारक असर गर्न सक्छ ।”
यस अनुसन्धान पत्रले क्याफिनले फरक–फरक व्यक्तिलाई फरक–फरक असर गर्ने कुरामा जोड दिएको छ । मानिसको शरीरले यसलाई कसरी पचाउँछ भन्ने कुरा उनीहरूको वंशाणुगत गुण (जेनेटिक्स), पाचन प्रक्रिया (मेटाबोलिजम), उमेर र पहिलेदेखिको प्रयोगमा भर पर्छ । मार्कसले थपे, “सुरक्षित प्रयोगका लागि सबैलाई एउटै नियम लागू हुँदैन भन्ने कुरा याद राख्न जरुरी छ ।”