फिल्मभन्दा निर्देशकको क्रेज ठूलो

हरेक हलिउड स्टुडियोलाई आफ्नै ‘क्रिस्टोफर नोलन’ चाहिएको छ । यस सप्ताहन्तले त्यसको कारण देखाएको छ ।
नोलनले लेखेको र निर्देशन गरेको फिल्म ‘द ओडिसी’ले पहिलो सातामा विश्वभर करिब २६ करोड ४१ लाख डलर कमाउँदै धाँसू ओपनिङ गरेको छ । अमेरिकाभित्र यसको १२ करोड ४५ लाख डलरको डेब्यु यस वर्षको तेस्रो ठूलो ओपनिङ हो । यो एनिमेटेड फिल्महरू ‘टोय स्टोरी ५’ र ‘द सुपर मारियो ग्यालेक्सी मुभी’पछि सबैभन्दा बढी कमाउने फिल्मका रूपमा उदाएको छ ।
एडल्ट सर्टिफिकेट पाएको फिल्मको यो विशाल कमाइ यस वर्षको पहिलो फिल्म बन्न पुगेको छ । नत्र त, यो सूचीमा एनिमेटेड फिल्महरु मात्र रहेका थिए । दुःखको कुरा, फिल्म रिलिज भएको दोस्रो सातामा पहिलो साताको जस्तो धाँसू व्यापार भने स्वात्तै घट्न पुगेको छ  । 
हालसम्म यो फिल्मले संसारभरबाट ३८ करोड ९० लाख डलर भेला पारेको छ । भारतमा मात्र यो फिल्मले आइतबारसम्म १२९ करोड १५ लाख भारू कमाएको छ ।
यसको ओपनिङ सन् २०२६ मा रिलिज भएका चलेका नामहरू जस्तै ‘स्टार वार्सः द म्यान्डलोरियन एन्ड ग्रोगु’, ‘सुपरगर्ल’ र ‘स्क्रिम ७’ को भन्दा पनि बढी छ ।
नोलनको नाम र उनले विगतमा गरेको कमाइले गर्दा नै कमकास्टको युनिभर्सल पिक्चर्सले झन्डै २५ करोड डलर बजेटको यो फिल्म बनाउन राजी भएको हो । प्राचीन ग्रिक महाकाव्यमा आधारित यो आर–रेटेड फिल्म युरोपभर सुटिङ गरिएको थियो । यसमा ३५ फिट अग्लो र ८ हजार पाउन्ड तौल भएको ‘ट्रोजन हर्स’ लगायत धेरै वास्तविक इफेक्टहरू प्रयोग गरिएका छन् ।
रेन्ट्राक कम्पनीको तथ्यांक अनुसार, ‘द ओडिसी’ हेर्न जाने ५३ प्रतिशत दर्शकले यो फिल्म हेर्नुको मुख्य कारण यसका निर्देशक हुन् भनेका छन् । ‘यस्तो कुरा विरलै देख्न पाइन्छ,’ फिल्म निर्माता कम्पनी युनिभर्सलका जिम ओरले भने, ‘क्रिस नोलनले दर्शकको विश्वास र सम्मान कमाएका छन् ।’
सन् २००० र २०१० को दशकमा फिल्म उद्योगमा फ्रेन्चाइज (शृंखला) हरूको दबदबा थियो । स्टुडियोहरूले सिक्वेल, स्पिनअफ र रिमेकहरू सकेसम्म छिटो बनाउन सक्ने निर्देशकहरूलाई मात्र काम दिन्थे । आफ्नै सर्तमा काम गर्ने थोरै फिल्म निर्माताहरूमध्ये नोलन सबैभन्दा सफल थिए । निकै सफल ‘डार्क नाइट’ ट्रियोलजीसँगै उनले ‘इन्सेप्सन’ र ‘इन्टरस्टेलर’ जस्ता हिट ओरिजिनल फिल्महरू बनाए ।
तर मार्भल कमिक्सका फिल्महरू, फास्ट एन्ड फ्युरियस र ट्रान्सफर्मर्स जस्ता शृंखला फिल्महरूले पछिल्लो समय बक्स अफिसमा खासै कमाउन सकेका छैनन् । दर्शकहरू यस्ता फिल्मबाट वाक्क भइसकेका छन् । विशेषगरी नयाँ पुस्ता (जेनजी) पुरानै ब्रान्ड र प्रविधिमा धेरै भर पर्ने फिल्मप्रति विश्वस्त देखिँदैनन् । उनीहरू ‘अब्सेसन’ जस्ता ब्लकबस्टर हरर फिल्मका निर्देशक करी बार्करजस्ता आफ्नै मौलिक सोच भएका निर्देशकहरूले कथेका कथामा बढी तानिन्छन् । यो वर्ष ‘प्रोजेक्ट हेल मेरी’ र ‘ब्याकरुम्स’ जस्ता निर्देशकको भिजनमा बनेका फिल्महरू हिट भएका छन् ।
यसको जवाफमा, पहिले फ्रेन्चाइज व्यवस्थापनमा मात्र मरिहत्ते गर्ने स्टुडियोहरू अहिले सम्भावना भएका राम्रा फिल्म निर्माताहरूलाई भित्र्याउन बढी ऊर्जा खर्चिरहेका छन् । यी सर्जकहरूले ठूला ब्रान्डलाई पर्दामा ल्याउन करोडौं डलर पारिश्रमिक पाइरहेका छन् भने नयाँ कथाका लागि बजेट पनि बढाइएको छ ।
हलिउडको क्रिएटिभ आर्टिस्ट एजेन्सीका प्रमुख कार्यकारी ब्रायन लार्ड भन्छन्, ‘के चल्छ र के चल्दैन भन्ने कुरामा स्टुडियोहरू अलमलमा छन् । धेरै कुरा पुस्ताअनुसार परिवर्तन हुन्छन् र भएका पनि छन् भने निजी कथा तथा छुट्टै आवाज भएकाहरूले यसको फाइदा लिइरहेका छन् ।’
वार्नर ब्रदर्सले ‘ब्ल्याक प्यान्थर’ र ‘क्रिड’का निर्देशक रायन कुग्लरलाई उनको ओरिजिनल हरर फिल्म ‘सिनर्स’ बनाउन एकदमै राम्रो सम्झौता दिएको थियो । उक्त फिल्म गत वर्ष निकै हिट मानिएको थियो । ‘वेपन्स’ का निर्देशक ज्याक क्रेगरले यसै वर्ष सोनी पिक्चर्सको लागि भिडियो गेम ‘रेसिडेन्ट इभिल’मा आधारित फिल्म बनाउँदैछन् र उनी वार्नरले नयाँ हरर फिल्मका लागि गरेको ठूलो सम्झौताको हिस्सा पनि थिए । ‘बार्बी’की निर्देशक ग्रेटा गर्विगले आफ्नो प्रभाव प्रयोग गर्दै नेटफ्लिक्सलाई उनको नयाँ फिल्म ‘द क्रोनिकल्स अफ नार्निया’ अर्को वर्ष विश्वभर हलमा रिलिज गर्न राजी गराएकी छन् ।
महामारीको समयमा आफ्नो फिल्म ‘टेनेट’ को निराशाजनक रिलिज र कम्पनीले २०२१ का सबै फिल्महरू एकैसाथ हल र स्ट्रिमिङमा ल्याउने निर्णय गरेपछि नोलनले लामो समयदेखि काम गर्दै आएको वार्नर ब्रदर्स छाडेका थिए । त्यसपछि उनलाई धेरै स्टुडियोहरूले काम दिन पछ्याएका थिए ।
उनको नयाँ सहयोगी युनिभर्सलले उनलाई लगभग पूर्ण स्वतन्त्रता मात्र दिँदैन, बरु उनका फिल्महरूलाई हलमा मात्र असाधारण रूपमा लामो समय दिएर घरमै बसेर हेर्दा हुने सम्भावित आम्दानी पनि माया मार्छ । युनिभर्सलका लागि उनको पहिलो फिल्म, २०२३ को ‘ओपेनहाइमर’, रिलिज भएको १२० दिनपछि मात्र घरमा हेर्न उपलब्ध भएको थियो । जबकि फिल्म उद्योगको सामान्य नियम अनुसार यो समय ४५ दिनको मात्र हुन्छ ।
‘ओपेनहाइमर’ ले संसारभर ९७ करोड ६० लाख डलरको सानदार कमाइ गरेको थियो र उत्कृष्ट फिल्म र निर्देशकसहित सातवटा ओस्कार अवार्ड जितेको थियो ।
नोलनका धेरैजसो फिल्महरू जस्तै, ‘द ओडिसी’ ले पनि महँगो टिकट पर्ने आईम्याक्स हलहरू सबै हाउसफुल हुँदा फाइदा लियो । नोलनले आईम्याक्सको ठूलो पर्दा भरिने गरी पूरै फिल्म खिचेका थिए । विश्वभरका कुल हलहरूमध्ये १ प्रतिशतभन्दा कम मात्र आईम्याक्स हल भए तापनि यसले कुल विश्वव्यापी कमाइको करिब २० प्रतिशत हिस्सा ओगटेको छ ।
अनुसन्धान कम्पनी इन्टटेलिजेन्सका अनुसार, अमेरिका र क्यानडामा बिक्री भएका कुल टिकटमध्ये ४५ प्रतिशत टिकट सबै प्रकारका प्रिमियम स्क्रिन (ठूला र सुविधासम्पन्न हल) हरूको थियो ।
अनुसन्धान कम्पनी सिनेमास्कोरका अनुसार दर्शकबाट पाएको ‘ए’ सर्टिफिकेट र अत्यधिक सकारात्मक समीक्षाको आधारमा, ‘द ओडिसी’ सन् २०१२ को ‘द डार्क नाइट राइजेज’ पछि विश्वभर १ अर्ब डलरभन्दा बढी कमाउने नोलनको पहिलो फिल्म बन्न सक्छ ।