‘लस्ट इन मण्डला’मा बौद्ध दर्शन

नेपाली एनिमेसन र भीएफएक्सका क्षेत्रमा स्थापित अग्रणी स्टुडियो ‘इन्सेसेन्ट रेन’ले विश्व बजारलाई लक्षित गर्दै ठूलो लगानीको एनिमेटेड चलचित्र ‘लस्ट इन मण्डला’ निर्माण गर्ने भएको छ ।
नेपालको आफ्नै मौलिक कला, संस्कृति र आध्यात्मिक दर्शनलाई आधार बनाएर निर्माण हुन लागेको यो चलचित्रले नेपाली एनिमेसन उद्योगलाई अन्तर्राष्ट्रिय स्तरमा नयाँ उचाइमा पु¥याउने लक्ष्य राखेको छ ।
राजधानीमा आयोजित एक विशेष कार्यक्रममा चलचित्रका परिकल्पनाकार तथा निर्देशक किरणभक्त जोशीले चलचित्रको ‘टेस्ट फुटेज’ सार्वजनिक गर्दै यसको भिजुअल स्टाइल र कथावस्तुबारे जानकारी दिएका हुन् । निर्देशक जोशीका अनुसार यो चलचित्र पिक्सार वा डिज्नीजस्ता हलिउड स्टुडियोहरूको नक्कल नभई पूर्णतः नेपालीपन झल्कने गरी निर्माण भइरहेको छ । 
‘हामी पिक्सार वा डिज्नी जस्तो देखिने फिल्म बनाउन चाहँदैनौं । हामीले नेपालको गौरव थांका पौभा र मिथिला कलाबाट प्रेरित भएर एक मौलिक भिजुअल स्टाइल विकास गरेका छौं,’ जोशीले भने ।
चलचित्रले १२ वर्षकी  शान्ति नामकी एउटी बालिकाको साहसिक यात्राको कथा भन्छ । आफूलाई त्यागिएको महसुस गर्ने शान्ति र उनका साथीहरू कसरी एउटा चमत्कारी ’मण्डला’ संसारमा पुग्छन् र त्यहाँका दुष्ट शक्तिसँग लड्छन् भन्ने यसको मुख्य कथा हो । चलचित्रले बौद्ध दर्शनको ‘अनित्य’, माया तथा करुणाको सन्देशलाई समेटेको छ ।
चलचित्रको भिजुअलमा थांका पेन्टिङमा देखिने बादल, हिमाल र वनस्पतिको शैलीलाई थ्रीडी एनिमेसनमा निकै आकर्षक ढंगले उतारिएको छ । यसका लागि हलिउडका चर्चित चलचित्रहरू ‘एक्स–मेन’ र ‘थोर’का लेखक ज्याक र ‘स्पाइडर–भर्स’की निर्माता जिन्को गोटोजस्ता अनुभवी व्यक्तित्वहरूको समेत प्राविधिक साथ रहेको छ ।
व्यापारिक दृष्टिकोणले पनि यो चलचित्र निकै महŒवाकांक्षी देखिएको छ । इन्सेसेन्ट रेनकी दीपा जोशीका अनुसार चलचित्रलाई हल प्रदर्शनसँगै अस्कर अवार्डको प्रतिस्पर्धामा लैजाने योजना छ ।
यो चलचित्रमा कति लगानी लाग्छ भन्ने अझै प्रस्ट नभए पनि नेपाली लगानीकर्ताहरूबाट साथको अपेक्षा गरेको दीपाले बताइन् । नेपाली लगानीकर्ताहरूका लागि निकै पारदर्शी ‘आरओआई वाटरफल’ मोडल प्रस्तुत गर्दै उनले लगानीकर्ताले सुरुमा शतप्रतिशत पुँजी फिर्ता पाउने र पछि मुनाफामा ५० प्रतिशतसम्मको साझेदारी रहने जानकारी दिइन् ।
‘डिज्नीले २५० मिलियन डलरमा बनाउने गुणस्तरको फिल्म हामीले नेपालमा निकै कम लागतमा तयार गर्दैछौं,’ निर्देशक जोशीले थपे, ‘यो एउटा फिल्म मात्र होइन, नेपालमा एनिमेसनको नयाँ उद्योग र रोजगारी सिर्जना गर्ने एउटा अभियान पनि हो ।’
कार्यक्रममा चलचित्रका साझेदार तथा ट्राइ–सिटी पिक्चर्सका नकिम उद्दिनले विगत २५ वर्षदेखि आफूहरू फिल्म वितरणमा लागेको र यो प्रोजेक्टले नेपाली फिल्मलाई वैश्विक बजारमा लैजाने ढोका खोल्ने विश्वास व्यक्त गरे । त्यस्तै, लगानीकर्ता शिवानले नेपालमा रहेको जनशक्ति, कम लागत र उत्कृष्ट कथावाचनले गर्दा यो चलचित्र व्यावसायिक रूपमा निकै सफल हुने दाबी गरे ।
चलचित्रसँगै यसको भिडियो गेम र अन्य सिरिजहरू पनि विकास गर्ने योजना रहेको पनि सिवानले बताए । 
इन्सेसेन्ट रेनले विगत १५ वर्षदेखि डिज्नी र अन्य अन्तर्राष्ट्रिय स्टुडियोका लागि काम गर्दै आएको अनुभवलाई यसपटक आफ्नै मौलिक ‘आईपी’ (बौद्धिक सम्पत्ति) सिर्जनामा प्रयोग गर्न लागेको हो । यो चलचित्र सिनेमा हलसम्म आइपुग्न अझै दुई वर्षसम्म लाग्ने अनुमान गरिएको छ ।
लगानीकर्ताहरूको खोजीका लागि प्रदर्शन गरिएको टेस्ट फुटेजमा नेपाली चलचित्रका प्रख्यात निर्माता–निर्देशक निश्चल बस्नेतदेखि ज्योति समूहका सौरभ ज्योतिलगायत अन्यको उपस्थिति थियो ।