खिम्ती–घ्वाङ्मा एनएमबीको एकल लगानी

काठमाडौं । दोलखा र रामेछापको सीमाक्षेत्रमा निर्माणाधीन ९ मेगावाट क्षमताको खिम्ती–घ्वाङ् साना जलविद्युत आयोजनामा एनएमबी बैंकले एकल लगानी गर्ने प्रतिबद्धता जनाएको छ । बैंकले वन्डर्स इनर्जी प्रालिले प्रवर्धन गरेको यो आयोजनामा कुल लागतको ऋण लगानीबापतको १ अर्ब २४ करोड रुपैयाँ ऋण लगानी गर्ने प्रतिबद्धता जनाएको हो ।
आयोजनाको प्रवर्धक कम्पनी र बैंकबीच मंगलबार वित्तीय व्यवस्थापन सम्झौतामा हस्ताक्षर भएको छ । सम्झौतामा एनएमबी बैंकका तर्फबाट सस्टेनेबल इनर्जी बैंकिङ विभाग प्रमुख दिनेश दुलाल र कम्पनीका तर्फबाट प्रबन्ध सञ्चालक प्रकाशचन्द्र दुलालले हस्ताक्षर गरेका छन् ।
आयोजना निर्माण सम्पन्न गर्न कुल १ अर्ब ८० करोड रुपैयाँ लागत अनुमान गरिएको छ । एनएमबी बैंकले दिने ऋण लगानीबाहेकको १ अर्ब २४ करोड रुपैयाँ बाहेकको ५६ करोड रुपैयाँ लगानी स्वपुँजीबाट व्यवस्थापन गरिने पनि उनले बताए । स्वपुँजीबापतको लगानी हुने ५६ करोड रुपैयाँमध्ये ३५ करोड रुपैयाँ जुटिसकेको र बाँकी रकम चालु आर्थिक वर्षको असोजसम्ममा व्यवस्थापन भइसक्ने पनि प्रबन्ध सञ्चालक दुलालले बताए । वन्डर्स इनर्जीले दोलखा जिल्लाको जिरी नगरपालिका–१ र रामेछाप जिल्लाको गोकुलगंगा गाउँपालिका–१ भएर बग्ने खिम्ती (घ्वाङ्) खोलामा आयोजना निर्माण गरिरहेको छ । कम्पनीका अनुसार यो आयोजना २०८४ साल चैतभित्र निर्माण सम्पन्न गरी विद्युत् उत्पादन गर्ने लक्ष्य छ । 
आयोजनाले भौतिक संरचना निर्माणका लागि आवश्यक सरकारी जग्गा प्राप्ति तथा रुख कटानको अनुमति पाइसकेको छ । गत वैशाख १५ गते बसेको मन्त्रिपरिषद् बैठकले आयोजनाले अधिग्रहण गर्ने वन क्षेत्रको जग्गा प्राप्ति तथा रुख विरुवा कटानको अनुमति दिएको थियो । 
कम्पनीका प्रबन्ध सञ्चालक दुलालका अनुसार आयोजनाका लागि आवश्यक अधिकांश जग्गा खरिद, पहुँचमार्गको निर्माण, विद्युत्को पहुँच विस्तार, गोदाम तथा आवासगृहको निर्माण कार्य सम्पन्न भइसकेको छ । ‘हामीले आयोजना स्थलमा पूर्वतयारीका धेरै काम सम्पन्न गरिसकेका छौं,’ उनले भने, ‘सिभिल, हाइड्रो–मेकानिकल र इलेक्ट्रो–मेकानिकलतर्फको निर्माण ठेक्का सम्झौता सम्पन्न गरी आयोजना स्थलमा धमाधम काम भइरहेको छ ।’ उनका अनुसार आयोजनामा अहिलेसम्म ३० प्रतिशत कार्य सम्पन्न भइसकेको छ । 
गौरीशंकर संरक्षण क्षेत्रभित्र निर्माण हुन लागेको यो आयोजना नेपालमा निर्माणाधीन जलविद्युत् आयोजनामध्ये अन्तर्राष्ट्रिय हाइड्रो सेलेक्ट टुल्स मापदण्डअनुसार सामाजिक तथा वातावरणीय पक्ष पूरा गर्दै निर्माण भइरहेको पहिलो आयोजना हो । कम्पनीले आयोजनालाई दिगो विकास, वातावरणीय संरक्षण र स्थानीय समुदायसँगको सहकार्यलाई प्राथमिकतामा राखेर अघि बढाइने जनाएको छ ।