महिलालाई ड्राइभिङ पेसामा अवसर विस्तार गर्न पहल

काठमाडौं । विश्वव्यापी मोबिलिटी तथा डेलिभरी प्लेटफर्म इनड्राइभले महिलालाई ड्राइभिङ पेसामा समान अवसर सिर्जना गर्ने उद्देश्यले सञ्चालन गरेको ‘इनड्राइभ ड्राइभिङ नारी नेपाल’ कार्यक्रमको पहिलो चरण सम्पन्न गरेको छ । कार्यक्रमअन्तर्गत तीन महिनाको प्रशिक्षण पूरा गरेका १० जना महिलालाई काठमाडौंमा आयोजित समारोहमा प्रमाणपत्र प्रदान गरिएको हो । अप्रिल २०२६ देखि सञ्चालनमा आएको कार्यक्रम विशेषगरी अवसरबाट बञ्चित समुदायका महिलालाई मोबिलिटी क्षेत्रमा आर्थिक अवसरसँग जोड्ने उद्देश्यले सुरु गरिएको इनड्राइभले जनाएको छ ।

महिलालाई परम्परागत रूपमा पुरुषको वर्चस्व रहेको ड्राइभिङ पेसामा प्रवेश गर्न सहयोग पु¥याउने लक्ष्यसहित प्रशिक्षण सञ्चालन गरिएको हो । प्रशिक्षणका क्रममा सहभागीलाई सुरक्षित रूपमा दुईपांग्रे सवारी सञ्चालन गर्ने व्यावहारिक सीप, सडक सुरक्षासम्बन्धी ज्ञान तथा औपचारिक सवारी चालक अनुमतिपत्र (लाइसेन्स) प्राप्त गर्न आवश्यक सहजीकरण गरिएको थियो । सहभागीलाई सुरक्षात्मक हेल्मेट तथा प्राथमिक उपचार सामग्रीसहितको सुरक्षा किट पनि उपलब्ध गराइएको थियो । फाइटब्याक नेपालसँगको सहकार्यमा आत्मरक्षा तालिमसमेत सञ्चालन गरिएको कार्यक्रम आयोजकले जनाएको छ ।

प्रमाणपत्र वितरण समारोहमा काठमाडौं उपत्यका ट्राफिक प्रहरी कार्यालयका डीएसपी सुनिलजंग शाहले सडक सुरक्षा सबैको साझा जिम्मेवारी भएको उल्लेख गर्दै ट्राफिक नियमको पालना, सतर्कता र निरन्तर सिकाइलाई व्यावसायिक चालकका लागि अपरिहार्य बताए । समारोहमा इनड्राइभ नेपालकी ब्रान्ड एम्बेसडर स्वस्तिमा खड्काले प्रशिक्षण पूरा गरेका १० जना सहभागीलाई प्रमाणपत्र, सुरक्षा किट तथा मायाको चिनो प्रदान गरिन् ।

कार्यक्रममा सहभागी महिलाको प्रशिक्षण यात्रामाथि आधारित भिडियोसमेत प्रदर्शन गरिएको थियो । साथै एक सहभागीलाई विद्युतीय स्कुटर, तीन जनालाई स्मार्टफोन र छ जनालाई स्मार्टवाच प्रदान गरिएको थियो । इनड्राइभ साउथ एसियाकी कम्युनिकेसन म्यानेजर शेरिन एर्विना कौरले महिलालाई राइड–हेलिङ क्षेत्रमा प्रवेश गर्ने अवसर विस्तार गर्न तालिम, लाइसेन्स र डिजिटल प्लेटफर्ममा पहुँचलाई एउटै कार्यक्रममार्फत जोडिएको बताइन् । इनड्राइभ नेपालकी कम्युनिकेसन्स म्यानेजर मञ्जिता गुरुङले महिलालाई सीप विकाससँगै आत्मविश्वास, पारिवारिक समर्थन र आम्दानीका अवसरसँग जोड्ने उद्देश्यले कार्यक्रम सञ्चालन गरिएको उल्लेख गरिन् । इनड्राइभ नेपालकी सिनियर ड्राइभर अपरेसन्स स्पेसलिस्ट सुनिता जीमी राईले महिलाको सहभागिताले मोबिलिटी क्षेत्रलाई थप समावेशी बनाउने बताइन् भने ब्रान्ड एम्बेसडर स्वस्तिमा खड्काले कार्यक्रमले समान अवसर र सामाजिक रूपान्तरणको सन्देश प्रवाह गरेको धारणा व्यक्त गरिन् ।