हेटौँडामा संगीतकर्मी एवं साहित्यकारका तस्बिर

झट्ट सुन्दा अचम्म लाग्न पनि सक्छ । हेटौंडाको हरिकुञ्ज रोडस्थित पीएम सेन्टर संगीत विभागमा एकै ठाउँमा करिब ३५० जनाभन्दा बढी संगीतकर्मी, कलाकर्मी एवं साहित्यकारका तस्बिर देख्न सकिन्छ ।
संगीतका क्षेत्रमा साढे पाँच दशकयता निरन्तर लागिरहेका पीएम सेन्टर संगीत विभागका अध्यक्ष एवं वरिष्ठ संगीतकार प्रमेन्द्र महर्जन साहित्य, कला र संगीतमा योगदान गर्ने अग्रजको इतिहासको सम्मान तथा वर्तमान पुस्ताका लागि प्रेरणा दिने लक्ष्यसँगै संगीत, कलाकारिता एवं साहित्यका क्षेत्रमा क्रियाशील व्यक्तिहरूका तस्बिर एक÷एक गरी संकलन गरिहेका छन् ।
वरिष्ठ संगीतकर्मी गणेश ओस्ताद, नारायण गोपालदेखि वर्तमानका चासो र चर्चा कमाइरहेका नवोदित संगीतकर्मीसँगै महाकवि लक्ष्मीप्रसाद देवकोटादेखि नवोदित साहित्यकार समेतका तस्बिरहरूलाई उनले फ्रेमिङ गर्दै आएका छन् ।
विगत छ वर्षदेखि संगीतकर्मी, कलाकर्मी तथा साहित्यकारहरूका तस्बिरहरू संकलन गर्न सुरु गरेको बताउँदै उनले यस अभियानलाई आगामी दिनमा पनि निरन्तर रुपमा अघि बढाउने बताए । ‘मैले इतिहासमा विशिष्ट योगदान पु¥याएका अग्रज स्रष्टासँगै नयाँ पुस्ताका स्रष्टा समेतका तस्बिरलाई विभिन्न माध्यमबाट खोजेर संकलन गरिहेको छु,’ उनले भने, ‘यस अवधिमा करिब ३५० तस्बिर संकलन भइसकेका छन् ।’ 
आफ्नै निवासमा राखिएको पिएम सेन्टर संगीत विभागको कार्यालयमा सङ्कलित तस्बिरहरू रहेको र हाल भवन निर्माणका क्रममा रहेका कारण निर्माण सम्पन्न भएसँगै तस्बिरहरूलाई थप व्यवस्थित गर्ने योजना रहेको उनले बताए ।