भुवनको दोस्रो फिल्मले ल्यायो तरंग

सुपरस्टार भुवन केसीले निर्देशन गरेको दोस्रो फिल्म ‘बाटुलो जून’ भाइटीकाको भोलिपल्टबाट रिलिज हुँदैछ । १० वर्षअघि ‘ड्रिम्स’बाट निर्देशनमा हात हालेका केसीले यसपटक एउटा सफा पारिवारिक प्रेमकथालाई आकर्षक तरिकाले पस्कने प्रयास ट्रेलरबाट देखिएको छ । 
बुधबार मात्र ट्रेलर सार्वजनिक गरिएको थियो । नेपालको ५० वर्षअघिको परिवेशमा एउटा प्रेमकथा पस्कने उनले प्रयास गरेका छन् । गाउँमा पढाउन गएको एउटा शिक्षक र गाउँकी युवतीबीच पढाउने क्रममा हुने आत्मीयता, प्रेम र त्यसमा पर्ने भाँजोका बीच प्रेम जोगिन्छ कि जोगिँदैन भन्ने जिज्ञासा ट्रेलरले उत्पन्न गराएको छ । 
त्यसो त यसअघि नै दुई वटा गीतहरू सार्वजनिक भइसकेका छन् तर दुवै गीतले प्रभाव पार्न सकेका थिएनन् । यो ट्रेलरले भने फिल्मप्रति आकर्षण जगाउन सफल भएको छ ।
यसअघि भुवन केसीले टेलिभिजनमा दिएको अन्तरवार्ताका क्रममा पूर्वपत्नी सुस्मिता लामाका बारेमा दिएको बयानले निकै ठूलो चर्चा बटुलेको थियो । बटुल्नुको मुख्य कारण भने सुस्मिताले भुवनले ‘इमोसनको खेती’ गर्न खोजेको आरोप लगाएकी थिइन् । भुवनसँगको पारपाचुकेपछि आफू निकै अघि बढिसकेको तर पुरानै कुरा निकालेर भावुक हुनुको कुनै तुक नरहेको सुस्मिताको भनाइ थियो ।