विराटनगरको शानदार जित, काठमाडौँको दबदबा

दाेस्रो संस्करणको नेपाल प्रिमियर लिग (एनपिएल) क्रिकेट शुक्रबार रोमाञ्चक मोडमा पुगेको छ । त्रिवि अन्तरराष्ट्रिय क्रिकेट रङ्गशाला, कीर्तिपुरमा भएका दुई खेलले प्लेअफको समीकरण थप रोचक बनाएका छन् । एकातिर विराटनगर किंग्सले अन्तिम ओभरको नाटकीय क्षणमा कर्णाली याक्सलाई पराजित गर्‍यो भने अर्कोतिर काठमाडौँ गोर्खाजले चितवन राइनोजमाथि प्रभावशाली जित निकाल्दै प्रतिस्पर्धामा आफूलाई मजबुत बनायो ।

हिरो भए बसिर अहमद

कर्णाली याक्सले दिएको १६१ रनको लक्ष्य पछ्याएको विराटनगर किंग्सले १९.५ ओभरमा सात विकेट गुमाउँदै रोमाञ्चक जित निकालेको हो । एक समय कठिन देखिएको स्थितिमा बसिर अहमदले प्रस्तुत गरेको साहसी पारीले खेलको धार नै बदलिदियो ।

विराटनगरको सुरुआत खराब रहँदा लोकेश बम ६ रनमा र जर्ज मुन्से शून्यमै आउट भए । त्यसपछि साम हेजलेट (१६) र साहिल पटेल (१९) पनि लामो समय टिक्न सकेनन् तर पाँचौँ क्रममा आएका बसिर अहमदले ४३ बलमा ६२ रनको उत्कृष्ट पारी खेले । उनले तीन छक्का र तीन चौका प्रहार गर्दै रनरेटलाई तीव्र बनाएका हुन् ।

नारायण जोशीले २५ रनको महत्वपूर्ण योगदान दिए । विराटनगरलाई अन्तिम ओभरमा जितका लागि १० रन चाहिएको अवस्थामा अहमदले पाँचौँ बलमा प्रहार गरेको छक्काले मैदानमा रहेका दर्शकलाई समेत उभ्याइदियो ।

रोचक पक्ष के भने, १४ ओभरसम्म सुस्त गतिमा आएको विराटनगरले अन्तिम पाँच ओभरमा मात्र ७१ रन जोड्दै खेल आफ्नो पक्षमा फर्काएको हो ।

कर्णालीतर्फ सोमपाल कामी र गुलशन झाले दुई–दुई विकेट लिए भने पवन सरार्फ, नन्दन यादव र विलियम बोसिस्टोले एक–एक विकेट झारे।

यसअघि पहिले ब्याटिङ गरेको कर्णाली याक्सले निर्धारित २० ओभरमा तीन विकेटको क्षतिमा १६० रन बनाएको थियो । प्रियांक पञ्चालले ६३ रन बनाउँदै प्रतियोगितामा आफ्नो दोस्रो अर्धशतक पूरा गरे । उनको साथ विलियम बोसिस्टोले अविजित ४८ रन जोडे । यी दुईबीच दोस्रो विकेटका लागि ९६ रनको महत्वपूर्ण साझेदारी भएको थियो ।

विराटनगरतर्फ कप्तान सन्दीप लामिछाने र मर्चेन्ट डे लाङ्गेले एक–एक विकेट लिए ।

दिनको पहिलो खेलमा काठमाडौँ गोर्खाजले चितवन राइनोजलाई ५३ रनले पराजित गर्‍यो । १४३ रनको लक्ष्य पछ् याएको चितवन १७.२ ओभरमै ८९ रनमा समेटिन पुग्यो ।

चितवनका देव खनाल र रवि बोपराले समान २१ रन बनाए भने सोहेल तनभिरले १८ रन जोडे तर अन्य ब्याटर दोहोरो अंकमा पुग्न सकेनन् । काठमाडौँका राशिद खानले तीन विकेट लिँदा कप्तान करण केसी, साशब आलम र मिलिन्द कुमारले दुई–दुई विकेट हात पारे ।

यसअघि टस हारेर पहिले ब्याटिङ गरेको काठमाडौँ १९.४ ओभरमा १४२ रनमै अलआउट भएको थियो । जोन सिम्प्सनले ६० रनको आकर्षक पारी खेले भने मिलिन्द कुमारले ३८ रन जोडे । चितवनका सोहेल तनभिरले चार विकेट लिँदै केही क्षण आशा जगाएका थिए ।

‘तेस्रो जितले आत्मविश्वास बढ्यो’

जितपछि काठमाडौँ गोर्खाजका प्रशिक्षक वसन्त शाहीले टिमको मनोबल उच्च भएको प्रतिक्रिया दिएका छन् ।

‘आजको जितले मनोबल बढेको छ । अहिले हाम्रो लक्ष्य शीर्ष दुईभित्र रहँदै प्लेअफ पुग्नु हो,’ उनले भने । उनले टिमका सबै पक्षमा क्रमशः सुधार हुँदै गएको उल्लेख गर्दै आगामी खेलमा पनि जितको विश्वास व्यक्त गरे ।

शुक्रबारको नतिजासँगै विराटनगरले चार खेलबाट छ अङ्क जोड्दै प्लेअफ नजिक पुगेको छ । काठमाडौँ पनि यो जितपछि अङ्कतालिकाको तेस्रो स्थानमा उक्लिएको छ । कर्णालीका लागि भने अब बाँकी खेल ‘गर या मर’को अवस्थामा पुगेका छन् ।

एनपिएलको दोस्रो संस्करण दिनप्रतिदिन रोमाञ्चक बन्दै जाँदा समर्थकको ध्यान अब हरेक खेलमा अन्तिम ओभर र अन्तिम बलतर्फ केन्द्रित हुन थालेको छ ।