लुम्बिनीको ऐतिहासिक प्लेअफ

नेपाल प्रिमियर लिग (एनपीएल) मा शुक्रबारको खेलले प्रतियोगिताको प्लेअफ चित्र पुरै स्पष्ट बनाइदिएको छ । लुम्बिनी लायन्सले जनकपुर बोल्ट्सलाई ४ विकेटले पराजित गर्दै पहिलोपटक प्लेअफमा प्रवेश गर्दा जनकपुरसहित पोखरा एभेन्जर्स र चितवन राइनोजको सम्भावना औपचारिक रूपमा समाप्त भएको छ । यस जितले लुम्बिनीलाई अन्तिम चारमा सुनिश्चित गरिदियो भने शीर्ष स्थानका लागि चलिरहेको प्रतिस्पर्धामा पनि नयाँ मोड सिर्जना गर्‍यो ।

टस जितेर पहिले ब्याटिङ गरेको जनकपुरले फेरि अपेक्षित प्रदर्शन देखाउन सकेन । सुरुवाती चरणमै विकेट गुमाउँदै ८३/६ को अवस्थासम्म पुगेपछि टोली संकटमा परेको थियो । त्यो अवस्थाबाट संगीथ कुरेले ४५ रन र मयन यादवले २७८ रन बनाएर पुछार सम्हाले पनि जनकपुर १३२ रनमै सीमित रह्यो । कप्तान फेरबदलले निरन्तर विवाद र अस्थिरता सृजना गरेको जनकपुरको समग्र सिजन नै कमजोर रहँदै आएको छ । पाँच खेलमा तीनजसो कप्तान परिवर्तन हुनु, योजनाहीन ब्याटिङ र अस्थिर मध्यक्रमले अन्ततः डिफेन्डिङ च्याम्पियनको यात्रा समयमै समाप्त गरिदियो ।

१३३ रनको लक्ष्य पछ्याएको लुम्बिनीको सुरुवात स्थिर रह्यो । कप्तान रोहित पौडेलले जिम्मेवारीपूर्वक ३४ रन जोडे भने डार्सी सर्ट, डिकवेला र जेजे स्मिथले पनि आवश्यक योगदान दिए । खेल १२औँ ओभरतिर रोचक बन्यो, जब जनकपुरका मयन यादवले दुई बलमा दुई विकेट निकाल्दै दबाब सिर्जना गरेका थिए । तर लुम्बिनीको तल्लो–मध्यक्रमले संयमित खेल प्रदर्शन गर्दै १९.१ ओभरमा लक्ष्य भेट्टायो । जनकपुरका संगीथ कुरेले तीन विकेट र मयन यादवले दुई विकेट लिए तापनि टोली जितबाट टाढै रह्यो ।

यस जितसँगै एनपीएलको प्लेअफ समीकरण पूरा भएको छ । सुदूरपश्चिम रोयल्स १२ अंकसहित शीर्ष स्थान सुरक्षित गर्दै क्वालिफायर–१ मा पुगेको छ । काठमाडौँ गोर्खाज र विराटनगर किंग्सले दोस्रो स्थानका लागि प्रतिस्पर्धा गरिरहेका छन् भने लुम्बिनी लायन्स एलिमिनेटरमा उक्लिएको छ । आज शनिबार हुने सुदूरपश्चिम–विराटनगर खेलले दोस्रो र तेस्रो स्थानको अन्तिम निर्धारण गर्नेछ, जसले आगामी नोक–आउट चरणलाई थप रोचक बनाउने संकेत दिएको छ । लुम्बिनीको प्लेअफ यात्रा यो संस्करणको सबैभन्दा ठूलो ‘टर्न–अराउन्ड’ कथामध्ये एक बनेको छ । निरन्तर पराजयबाट सुरु भएको यात्रालाई सम्हालेर अन्तिम चारमा स्थान बनाउन टोलीले देखाएको उत्कृष्ट पुनरागमन प्रशंसनीय मानिएको छ । जनकपुरको पतन भने अस्थिर नेतृत्व, कमजोर फर्म र योजना अभावका कारण उत्पन्न भएको स्पष्ट देखिन्छ । एनपीएल अब शीर्ष चार टोलीबीचको रणनीतिक प्रतिस्पर्धामा प्रवेश गर्दै फाइनलसम्म अझ रोचक हुने संकेत मिलेको छ ।

लुम्बिनी प्लेअफमा पुग्दा जनकपुर, पोखरा एभेन्जर्स र चितवन राइनोज एक खेल अगावै खेलबाट बाहिरिएका छन् । यसअघि सुदूरपश्चिम रोयल्स, काठमाडौँ गोर्खाज र विराटनगर किंग्स प्लेअफमा सुरक्षित भइसकेका छन् ।

प्लेअफमा पुग्दा खुशीः रोहित

राजधानीमा जारी एनपिएल क्रिकेटमा लुम्बिनी लायन्स प्लेअफमा सुरक्षित भएको छ । शुक्रबार सम्पन्न जनकपुर बोल्ट्सविरुद्धको खेलमा चार विकेटको जित निकाल्दै लुम्बिनी प्लेअफ पुग्ने अन्तिम टोलीसमेत बनेको छ ।

चार खेलबाट आठ अङ्क जोड्दै लुम्बिनी प्लेअफ पुग्दा जनकपुरसहित पोखरा र चितवन लिग चरणको अन्तिम खेल्न बाँकी छँदै बाहिरिएका छन् । यसअघि सुदूरपश्चिम, काठमाडौँ र विराटनगर प्लेअफमा सुरक्षित भइसकेका छन् ।

शुक्रबारको जितमा लुम्बिनीका कप्तान रोहित पौडेलले म्याच विनर पारी खेले । उनी प्लेयर अफ दी म्याचसमेत चुनिए । जितसँगै प्लेअफमा पुगेपछि कप्तान रोहित पौडेलले सञ्चारकर्मीसँग उत्साहित भएको प्रतिक्रिया दिए ।

उनले भने, ‘प्लेअफ पुग्दा एकदमै खुसी छौँ । अबका खेलमा राम्रो गरेर उपाधि जित्छौँ भन्ने लागेको छ ।’ आफ्ना लागि कुनै पनि टिम बलियो नरहेको बताउँदै उनले सहज जित निकाल्नेमा विश्वास व्यक्त गरे । उनले भने, ‘अबका खेलहरू भनेका नकआउट जस्तै हुन् । कुनै पनि टोलीसँग खेल्न हामीलाई गाह्रो हुँदैन ।’

उता जनकपुर बोल्ट्स कप्तान जान निकोल लफ्टि इटनले भने अब बाँकी रहेको अन्तिम खेल प्रतिष्ठा, समर्थक र व्यवस्थापनका लागि खेल्ने बताएका छन् ।