जनकपुरमाथि कर्णाली याक्सको रोमाञ्चक जित

नेपाल प्रिमियर लिग–२ को लिग चरणको अन्तिम खेल कर्णाली याक्स र डिफेन्डिङ च्याम्पियन जनकपुर बोल्ट्सबीच रोमाञ्चक ‘लो स्कोरिङ’ थ्रिलरमा परिणत भयो । लिगबाट पहिल्यै प्लेअफ दौडबाट बाहिरिएका यी दुई टोलीबीचको खेल प्रतिष्ठा जोगाउने मौका थियो। खेलमा कर्णालीले उत्कृष्ट बलिङ, निर्णायक क्षणमा गरिएको दबाब र संघर्षपूर्ण मानसिकता प्रदर्शन गर्दै जनकपुरलाई ३ रनले हराएको छ ।

कीर्तिपुरस्थित टीयू अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ९ विकेट गुमाएर १२९ रनको मध्यम स्कोर बनाएको थियो। पिच स्लो र टर्न हुने खालको भएकाले उच्च स्कोर अनुमान गर्न कठिन थियो । कर्णालीका ओपनर इमरान शेखले इन्गिङ्स सम्हाल्दै ३२ बलमा ३३ रन बनाए । उनले १ चौका र १ छक्का प्रहार गर्दै टीमलाई स्थिर सुरुवात दिलाए । त्यसपछि गुल्सन झाले २० बलमा १९ रन जोडे भने सोमपाल कामीले १० बलमा १८ रन बनाउँदै अन्त्यतिर द्रुतगति रन बटुले । प्रियांक पाञ्चल (१६), विलियम बोसिस्टो (१५) र नजिबुल्लाह जद्रान (१३) ले छोटो तर उपयोगी योगदान दिए ।

बलिङमा जनकपुरका ललित राजवंशी र आदित्य महताले २–२ विकेट लिए। त्यस्तै संगीथ कुरे, अनिलकुमार साह र माज सदाकतले एक–एक विकेट हात पारे ।

१३० रनको लक्ष्य पछ्याउने क्रममा जनकपुरले खराब सुरुआत गर्‍यो । २९ रनमै ४ विकेट गुमाउँदा कर्णाली पूर्ण रूपमा खेलमा हावी भएको देखिन्थ्यो। तर पाँचौँ विकेटका लागि कृष्णमूर्ति र संगीथ कुरेले ७५ रनको महत्वपूर्ण साझेदारी गर्दै जनकपुरलाई खेलमा फर्काए । कृष्णमूर्तिले आक्रामक ब्याटिङ शैली अपनाउँदै ३९ बलमा १ चौका र ४ छक्का प्रहारसहित ५१ रन बनाए। संगीथ कुरेले ३२ बलमा स्थिर २५ रन जोडे ।

१७औं ओभरको अन्तिम बलमा सोमपाल कामीले कुरेलाई आउट गरेपछि खेल पुनः कर्णालीतिर फर्कियो । त्यसपछि जनकपुर दबाबमा पर्‍यो र आवश्यक रनरेट बढ्दै गयो । अन्तिम ओभरमा जनकपुरलाई जितका लागि १४ रन आवश्यक थियो । दुवै टोलीका समर्थकहरूबीच रोमाञ्चक वातावरण बनेको थियो । तर अनुभवी कप्तान सोमपालको योजनाबद्ध बलिङ तथा फिल्ड सेटिङका कारण जनकपुरले त्यस ओभरमा १० रन मात्र जोड्न सक्यो र २ विकेट पनि गुमायो । यस्तै गर्दा जनकपुर ७ विकेट गुमाएर १२६ रनमा रोकियो र कर्णालीले ३ रनको स्मरणीय जित हात पार्‍यो ।

कर्णालीका बलर विलियम बोसिस्टोले २ विकेट लिए भने मार्क बोसिस्टो, पवन सर्राफ, नन्दन यादव र सोमपाल कामीले एक–एक विकेट झारे । कर्णालीको बलिङ र फिल्डिङ दुवै स्थिर र योजनाबद्ध देखियो, जो खेलको निर्णायक पक्ष बन्न पुग्यो ।

जितसँगै कर्णालीले सात खेलबाट ४ अंक जोड्दै लिग तालिकाको छैटौं स्थानमा सिजन पूरा गर्‍यो। समान अंक भएको चितवन राइनोजलाई कर्णाली नेट रनरेटमा पछाडि पार्दै अघि रह्यो । डिफेन्डिङ च्याम्पियन जनकपुरको यात्रा भने निराशाजनक रह्यो । सात खेलमध्ये उसले एक जित मात्रै निकाल्दै २ अंकसहित तालिकाको अन्तिम स्थानमा रह्यो । प्लेअफ पहुँच गुमाए पनि कर्णालीले अन्तिम क्षणसम्म लड्ने साहस प्रदर्शन गर्दै सिजन अन्त्य गरेका कारण यस जितलाई महत्वपूर्ण मानिएको छ । जनकपुरका लागि भने यो सिजन सिकाइको वर्ष बनेको स्पष्ट छ ।