एसिया कपका लागि नेपाली टोली घोषणा

अशोक धामीको कप्तानीमा नेपाली टोली यूएईमा आगामी शुक्रबारदेखि हुने एसीसी पुरुष यू–१९ एसिया कप खेल्ने भएको छ ।

नेपाल क्रिकेट संघले मंगलबार धामीको कप्तानीको १५ सदस्यीय टोली घोषणाा गरेको हो । टोलीमा नीरजकुमार यादव, दिलशाद अलि, अभिषेक तिवारी, सिब्रिन श्रेष्ठ, साहिल पटेल, दयानन्द मण्डल, निश्चल छेत्री, आशिष लोहार, नितेस पटेल, चन्दन रामरोशन विक, विपिन शर्मा, वंश छेत्री र युवराज खत्री छन् ।

तालिका अनुसार नेपालको पहिलो खेल श्रीलंकासँग आगामी शनिबार परेको छ । दोस्रो खेल सोमबार बंगलादेश र तेस्रो बुधबार डिसेम्बर १७ मा अफगानिस्तानसँग छ । खेल त्यहाँको सेभेन्स स्टेडियममा हुनेछन् । प्रतियोगितामा आठ टोली सहभागी हुँदैछन् । समूह ‘ए’ मा भारत, पाकिस्तान, यूएई र मलेसिया छन् भने ‘बी’ मा बंगलादेश, श्रीलंका, अफगानिस्तान र नेपाल छन् ।

प्रतियोगिताका खेल आइसीसी एकेडेमी र द सेभेन्स स्टेडियममा हुनेछन् । दुवै समूहबाट शीर्ष दुईमा रहने टोली डिसेम्बर १९ मा सेमिफाइनल खेल्नेछन् । उपाधि भिडन्त डिसेम्बर २१ मा हुनेछ ।