नेपाल–स्लोभेनिया व्यापार र लगानी विस्तारमा सहकार्य बढाउने सहमति

काठमाडौं । नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठ र नेपालका लागि स्लोभेनियाका आवासीय राजदूत टोमाज मेन्सिनबीच भेटवार्ता भएको छ । महासंघ सचिवालयमा सम्पन्न भेटका क्रममा नेपाल र स्लोभेनियाबीच व्यापार तथा लगानी विस्तारका उल्लेख्य सम्भावना रहेको विषयमा छलफल भएको छ ।
दुवै पक्षले दुई देशबीचको आर्थिक सहकार्यलाई थप सुदृढ बनाउन आवश्यक पहल गर्नुपर्नेमा जोड दिएका छन् । सो अवसरमा वरिष्ठ उपाध्यक्ष श्रेष्ठले स्लोभेनियालाई आर्थिक सहकार्यका लागि सम्भावनायुक्त साझेदारका रूपमा लिँदै आगामी दिनमा द्विपक्षीय सम्बन्धलाई नयाँ उचाइमा पु¥याउने विश्वास व्यक्त गरे । 
उनले नेपालमा बाह्य लगानी आकर्षित गर्न नीतिगत सुधार भएको उल्लेख गर्दै बहुमतको स्थायी सरकार गठनले नीतिगत स्थायित्व कायम हुनेमा निजी क्षेत्र आशावादी रहेको बताए । साथै, उनले व्यवसाय–व्यवसाय (बीटुबी) सहकार्य, व्यापार भ्रमण तथा संयुक्त प्लेटफर्ममार्फत सम्बन्ध विस्तार गर्न महासंघ तयार रहेको स्पष्ट पारे ।
त्यसैगरी, राजदूत मेन्सिनले नेपाल र स्लोभेनियाबीच सौहार्दपूर्ण सम्बन्ध रहेको उल्लेख गर्दै आर्थिक साझेदारीलाई अझ सुदृढ बनाउन सकिने बताए । उनले स्लोभेनियाली नागरिक नेपाललाई हिमालयको काखमा अवस्थित सुन्दर देशका रूपमा चिन्ने र भ्रमणप्रति आकर्षित हुने धारणा राखे ।
साथै, प्रविधि हस्तान्तरण, नवप्रवर्तन र संयुक्त लगानीका क्षेत्रमा सहकार्य विस्तार गर्न सकिने उनको भनाइ थियो । उक्त भेटमा नेपालका लागि स्लोभेनियाका अवैतनिक महावाणिज्यदूत हरिभक्त शर्मा पनि सहभागी थिए । नेपाल र स्लोभेनियाबीच सन् १९९७ मा कूटनीतिक सम्बन्ध स्थापना भएको हो ।