‘सरकारी लगानी र प्राथमिकता उत्पादनमुखी क्षेत्रतर्फ हुनुपर्छ’ : राजेशभक्त श्रेष्ठ,  अध्यक्ष, फ्लोरिकल्चर एसोसिएसन नेपाल

फ्लोरिकल्चर क्षेत्रको कुरा गर्दा पनि हामीले आयातसँग सम्बन्धित ठूलो चुनौती सामना गरिरहेका छौँ । हाम्रो देशमा उत्पादन सम्भव नहुने केही बीउ–विजन तथा अन्य सामग्रीहरूमा परनिर्भरता रहँदा समस्या अझ जटिल बनेको छ । फ्लोरिकल्चर उत्पादन र फिनिस प्रोडक्टहरू, कट फ्लावरदेखि प्लान्ट्ससम्मको अनियन्त्रित आयात, विशेषगरी खुला सीमाना मार्फत हुने अवैधानिक प्रवेशले देशभित्रको उत्पादनलाई गम्भीर असर पारेको छ । यसलाई नियन्त्रण गर्दै स्वदेशमै उत्पादनलाई प्रवद्र्धन गर्ने र आत्मनिर्भर बन्ने दिशामा लैजान आवश्यक छ। त्यसका लागि उत्पादक मैत्री नीति अपरिहार्य छ । कृषि क्षेत्र समग्र रूपमा हेर्दा नेपाल कृषिप्रधान देश भए पनि आवश्यक नीति, लगानी र सहजीकरण पर्याप्त छैन। मलको अभावजस्ता दीर्घकालीन समस्या आज पनि उस्तै छन् । यस्तो अवस्थामा सरकारको लगानी र प्राथमिकता उत्पादनमुखी क्षेत्रतर्फ अझ केन्द्रित हुनुपर्छ । हाम्रो मूल माग भनेको नै निजी क्षेत्रमैत्री नीति निर्माण हो । सरकारले हाल विभिन्न नीतिगत कदमहरू अघि बढाइरहेको देखिन्छ। तर ती निर्णयहरू लागू गर्नु अघि सम्बन्धित सरोकारवालाहरूसँग पर्याप्त छलफल र समन्वय गर्नु आवश्यक छ । निजी क्षेत्र सधैँ सरकारसँग सहकार्य गर्न तयार हुन्छ, र सरकार पनि निजी क्षेत्रलाई साथमा लिएर अघि बढ्नुपर्छ भन्ने हाम्रो धारणा हो । नीति निर्माण गर्दा सबै पक्षको आवाज सुन्ने, व्यवहारिकता मूल्याङ्कन गर्ने र त्यसपछि मात्र कार्यान्वयन गर्ने अभ्यास हुनुपर्छ। बारम्बार निर्णय गरेर पछि फिर्ता लिने प्रवृत्तिले लगानी वातावरणमा नकारात्मक असर पार्छ । निजी क्षेत्रले देशको अर्थतन्त्रमा करिब ८० देखि ८५ प्रतिशत योगदान दिइरहेको सन्दर्भमा यस क्षेत्रलाई नकारात्मक दृष्टिले होइन, विकासको साझेदारका रूपमा हेर्न आवश्यक छ । लगानी प्रवद्र्धनका लागि अनुकूल वातावरण सिर्जना गर्नु सरकारको प्रमुख दायित्व हो । नयाँ सरकार गठनसँगै केही सकारात्मक संकेतहरू देखिएका छन् । निजी क्षेत्रमैत्री नीति निर्माणको अपेक्षा पनि बढेको छ। त्यसलाई अझ मजबुत बनाउँदै लगानी आकर्षित गर्ने र व्यवसाय सञ्चालन सहज बनाउने दिशामा ध्यान दिनुपर्छ ।