अर्थमन्त्री वाग्लेको अभिव्यक्ति विवादमा

काठमाडौं । अर्थमन्त्री डा. स्वर्णिम वाग्लेले भारतविरोधी भावनासँग जोडिएको नेपाली राष्ट्रवादको युग सकिएको बताएपछि उनको अभिव्यक्ति विवादमा परेको छ । नयाँदिल्लीमा आयोजित ‘एनडीटीभी वल्र्ड समिट २०२६’ मा शुक्रबार उनले दिएको अभिव्यक्तिप्रति विपक्षी दलका नेताहरुले आपत्ति जनाएका हुन् । 
विगतमा दशकौंसम्म निश्चित वैचारिक प्रशिक्षणका कारण नेपाली राष्ट्रवादलाई भारत–विरोधसँग जोडेर हेर्ने भाष्य निर्माण भएको वाग्लेले  बताएका छन् । “तर, हाम्रो पुस्ता फरक छ । हामीले विश्व देखेका छौँ, हाम्रा आकांक्षाहरू आर्थिक छन् । हामी राम्रो रोजगारी, सुशासन र असल छिमेकी सम्बन्ध चाहन्छौँ,’ डा. वाग्लेले भनेका थिए, ‘त्यसैले म निकै खुसीका साथ भन्न सक्छु कि नेपाली राष्ट्रवादलाई ‘एन्टी–इन्डियनिज्म’ सँग जोड्ने त्यो युग अब सकियो ।” वाग्लेको यस्तो अभिव्यक्ति गलत रहेको भन्दै आलोचना भएको हो । 
पूर्वपरराष्ट्रमन्त्री एवम् राप्रपा नेता कमल थापाले वाग्लेको अभिव्यक्तिलाई नेपाली राष्ट्रियताको अवमूल्यन भन्दै नेपालको राष्ट्रवाद कुनै मुलुकको विरोधमा नभई सार्वभौमिकता र राष्ट्रिय हितको रक्षामा केन्द्रित रहेको बताएका छन् । “सीमा मिचिनु, डुबान हुनु वा नाकाबन्दीजस्ता ज्यादतीविरुद्ध बोल्नु भारतविरोध होइन, राष्ट्रप्रतिको निष्ठा हो,” थापाले भनेका छन् । उनले वाग्लेको भनाइबारे सरकारको धारणा समेत माग गरेका छन् ।
त्यस्तै, प्रतिपक्षी दल एमालेका नेता  गोकुल बाँस्कोटाले पनि अर्थमन्त्री वाग्लेको भनाइ गलत भएको बताएका छन् । नेपाली राष्ट्रवादलाई भारतविरोधसँग जोडेर त्यसको युग सकिएको भन्ने भाष्यले राष्ट्रवाद र राष्ट्रिय हितसम्बन्धी राजनीतिक, कूटनीतिक तथा ऐतिहासिक बुझाइलाई कमजोर बनाउने उनको टिप्पणी छ । “नेपाली राष्ट्रवाद भनेको भारतको विरोध हो–त्यो अब रहेन भन्ने भाष्य नै राष्ट्रबाद र राष्ट्रिय हित सम्बन्धि राजनीतिक, कूटनीतिक, ऐतिहासिक रुपमा आफ्नै बौद्धिक ज्ञानको टाट पल्टाई हो,” उनले भनेका छन् । एनडिटिभीको यो कार्यक्रमलाई भारतीय प्रधानमन्त्री नरेन्द्र मोदीले पनि सम्बोधन गरेका थिए । 
त्यस्तै, राजनीतिक विश्लेषक डम्बर खतिवडाले पनि वाग्लेको उक्त अभिव्यक्तिलाई लिएर टिप्पणी गरेका छन् । “स्वर्णिमजीले ठीकै भन्या हुन्– भारतविरोधी राष्ट्रवादको युग समाप्त भयो । तर, प्रम बालेन शाहका चुनाव अघिका फक यु वाला स्टाटस, ग्रेटर नेपालको नक्शा, चुच्चे नक्शाको जमिन फिर्ता गर्ने वाचा के हुन्छ ?,’ खतिवडाले लेखेका छन्, “कि ती सबै चुनाव जित्ने हत्कण्डा मात्रै  थिए ? यसको उत्तर बिना सस्तो चाकरी कस्ले पत्याउला वाग्लेजी ?”