तीन दिन वर्षा र हिमपातको सम्भावना

काठमाडौं । जल तथा मौसम विज्ञान विभागले कात्तिक १२ गतेदेखि केही प्रदेशमा वर्षा तथा उच्च पहाडी र हिमाली क्षेत्रमा हिमपातको सम्भावना रहेको बताएको छ । १३ र १४ गते केही स्थानमा भारी वर्षा तथा हिमपात हुन सक्ने पूर्वानुमानसहित सो अवधिमा सतर्कता अपनाउन आग्रह गरिएको छ । 
मौसम पूर्वानुमान महाशाखाका अनुसार हाल देशमा पश्चिमी वायुको आंशिक प्रभाव रहेको छ । कात्तिक १० गते मंगलबार कोशी, मधेश र बागमती प्रदेशमा आंशिक बादल लागेको छ ।  कोशी प्रदेशको हिमाली भूभागका एक–दुई स्थानमा हल्का वर्षा वा हिमपातको सम्भावना रहेको महाशाखाले जनाएको छ । राति कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा हल्का वर्षा हुन सक्नेछ ।
कात्तिक ११ गते बुधबार देशभर साधारणतया बादल लाग्ने पूर्वानुमान छ । कोशी, बागमती र गण्डकी प्रदेशका हिमाली भूभागका थोरै स्थानमा हल्का वर्षा वा हिमपात हुने सम्भावना छ । ती प्रदेशका पहाडी भूभागका एक–दुई स्थानमा पनि हल्का वर्षा हुन सक्छ ।
कात्तिक १२ गते बिहीबार भने मौसममा थप बदली भई वर्षा र हिमपातको सम्भावना रहेको पूर्वानुमान छ । महाशाखाका अनुसार कोशी, मधेश, बागमती र गण्डकी प्रदेशका धेरै स्थानमा, लुम्बिनी प्रदेशका केही स्थानमा तथा कर्णाली र सुदूरपश्चिम प्रदेशका थोरै स्थानमा मेघगर्जन र चट्याङसहित मध्यमसम्मको वर्षा वा हिमपात हुन सक्छ । त्यस दिन कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा भारी वर्षा वा हिमपात हुने सम्भावना छ । यस्तै, लुम्बिनी प्रदेशको तराई भूभागका एक–दुई स्थानमा भारी वर्षा हुन सक्ने महाशाखाले जनाएको छ ।
भारी वर्षाका कारण गेग्रान बहाव, बाढी, पहिरो र भूक्षयको जोखिम बढ्न सक्ने भएकाले आवश्यक सतर्कता अपनाउन महाशाखाले अनुरोध गरेको छ । 

३ दिन पदयात्रा अनुमति नदिइने 
सरकारले यही कात्तिक १२, १३ र १४ गते पदयात्रा नगर्न र नगराउन आग्रह गरेको छ । गृह मन्त्रालयअन्तर्गतको अध्यागमन विभागले मंगलबार सूचना जारी गर्दै उक्त अवधिभर पदयात्रा रोक्न अनुरोध गरेको जनाएको हो । उच्च पहाडी तथा हिमाली क्षेत्रहरूमा भारी हिमपात, हिमआँधी र हिमपहिरोको उच्च जोखिम रहेको भन्दै यस्तो सूचना जारी भएको छ । 
राष्ट्रिय विपद् जोखिम न्यूनीकरण तथा व्यवस्थापन प्राधिकरणको चेतावनीलाई उद्धृत गर्दै विभागले सम्भावित जोखिम न्यूनीकरणका लागि पदयात्रीहरूलाई सचेत गराएको छ । विभागका निर्देशक सूर्यप्रसाद चापागाईंले जारी गरेको सूचनाअनुसार, कात्तिक १२ देखि १४ गतेसम्म पर्यटकहरूलाई उच्च पहाडी र हिमाली क्षेत्रमा नजान आग्रह गरिएको छ । साथै, पदयात्रामा निस्किसकेका पर्यटकहरूलाई सो अवधिभर सुरक्षित ठाउँमै रहन भनिएको छ । सोहीकारण उक्त क्षेत्रमा जाने पदयात्री र विदेशी पर्यटकलाई सुरक्षित रहन र त्यस अवधिका लागि निषेधित क्षेत्रमा पदयात्रा नगर्न नगराउन विभागले अनुरोध गरेको छ ।
यसैगरी, प्रतिकूल मौसमलाई मध्यनजर गर्दै अध्यागमन विभागले उच्च पहाडी तथा हिमाली भेगका निषेधित क्षेत्रहरूमा जान दिइने पदयात्रा अनुमति पनि मंगलबारबाटै ती दिनहरूका लागि जारी नगर्ने निर्णय गरेको छ ।
विभागको सूचनामा ट्रेकिङ एजेन्सी, पदयात्री, गाइड (पथप्रदर्शक) लगायत सम्पूर्ण सरोकारवालाहरूलाई मौसमको जोखिमलाई ध्यानमा राखी सूचनाको पूर्ण पालना गर्न र सुरक्षित रहन अपिल गरिएको छ ।