नेभिगेशन
प्रदेश

कर्णाली सरकारको १०० दिनको उपलब्धि सार्वजनिक

कर्णाली । कर्णाली प्रदेश सरकारले एक सय दिनको उपलब्धि सार्वजनिक गरेको छ । मुख्यमन्त्री तथा मन्त्रिपरिषद् कार्यालय कर्णाली प्रदेश सुर्खेत, वीरेन्द्रनगरमा शनिबार आयोजित पत्रकार सम्मेलनमा नयाँ सरकार गठन भएयताको उपलब्धि सार्वजनिक गरिएको हो ।
मुख्यमन्त्री मंगलबहादुर शाहीले प्रदेश सरकारले १०० दिनमा अपेक्षित काम गरेको दाबी गर्दै कात्तिक २० गतेसम्म पुँजीगत ३.९३ र चालु १२.२४ प्रतिशत गरी कूल ७.२० प्रतिशत खर्च भएको बताए । ‘यो खर्च प्रगति गत आर्थिक वर्ष २०८२÷८३ को पहिलो चौमासिकभन्दा बढी हो,’ उनले भने, ‘स्रोत तथा जनशक्ति अभाव भए पनि नियमित काम धमाधम अगाडि बढिरहेका छन् ।’
मुख्यमन्त्री शाहीले पाँच विधेयक, दुई नियमावली, एक शैक्षिक योजना, ६ कार्यविधि प्रदेशसभामा पेस गर्न मन्त्रिपरिषद्बाट स्वीकृत गरिएको बताए । मूलतः आगामी मंसिर १६–२७ सम्म कर्णालीमा सञ्चालन हुने १०औँ राष्ट्रिय खेलकुद प्रतियोगिताको सम्पन्नता सम्पूर्ण तयारीका निम्ति प्रदेश सरकार युद्धस्तरमा काम गर्दै आएको उनले बताए । 
त्यस्तै, शासकीय सुधार कर्णाली प्रदेशमा रहेका विभिन्न तालिम केन्द्र कर्णाली प्रदेश प्रतिष्ठान केन्द्रमा गाभी एकीकृत तालिम केन्द्रको विकास गरिएको, कार्यसम्पादनका लागि संगठन तथा व्यवस्थापन प्रतिवेदन स्वीकृत गरी प्रदेश र स्थानीय तहका कर्मचारीको क्षमता विकासमा प्रबन्ध मिलाइएको, नतिजामुखी कार्यसम्पादनका लागि मुख्यमन्त्री र मन्त्री तथा मन्त्री र सचिव, सचिव र कार्यालय तथा आयोजना प्रमुखहरुबीच सम्झौता गरिएको उनले बताए । भोटकोशी बाढीपीडितका लागि दुई करोड रुपैयाँ प्रधानमन्त्री दैवी प्रकोप राहत कोषमा जम्मा, बाढी प्रभावितका लागि कर्णालीका १० वटै जिल्लामा १५ लाखका दरले जिल्ला विपद् व्यवस्थापन कोषमा शव ढुवानी तथा कीरिया खर्चबापत जम्मा गरिएको छ । चार महिनामा २४ करोड २७ लाख रुपैयाँ राजस्व संकलन भएको जानकारी मुख्यमन्त्री शाहीले दिए । 
त्यसैगरी, कर्णाली प्रदेशमा सञ्चालित रुग्ण, बहुवर्षीय र न्यून प्रगति भएका आयोजनाहरू शीघ्रताका साथ सम्पन्न गर्न सरोकारवाला निकाय र प्रतिनिधिहरूबीच छलफल गरिएको, कर्णाली प्रदेशका दशवटै जिल्लामा विपद् राहत तथा उद्धार सामग्री खरिदका लागि जिल्ला विपद् व्यवस्थापन राहत कोषमा रु २० लाखका दरले रकम हस्तारण गरिएको प्रदेश सरकारले जनाएको छ ।

प्रकाशित मिति:
प्रतिक्रिया दिनुहोस्