इन्टरनेट र एआईको जिम्मेवार प्रयोगबारे छलफल

काठमाडौं (संवाददाता) – इन्टरनेट र एआईको प्रयोग जिम्मेवार भई कसरी गर्न सकिन्छ भन्नेबारे नेपालमा विभिन्न २० देशका विज्ञहरूबीच छलफल भएको छ ।

चार दिनसम्म भएको छलफलमा विज्ञहरूले इन्टरनेट र एआईको सही र जिम्मेवार प्रयोगका लागि नयाँ पहलको आवश्यकता रहेको निष्कर्श निकालेका छन् । एशिया प्यासिफिक स्कलु अन इन्टरनेट गभर्नेन्सद्वारा आयोजित यो सम्मेलन असोज २१ देखि २४ गतेसम्म काठमाडौंमा सञ्चालन भएको थियो ।

आयोजक संस्थाका अध्यक्ष बाबुराम अर्यालले सम्मेलनमा १६ चरणमा छलफल भएको थियो भने २२ विज्ञ वक्ताहरूले विषयगत प्रस्तुति दिएका थिए । सम्मेलनमा १६ देशका सरकारी अधिकारी, सूचना प्रविधि विज्ञ, प्राध्यापक, पत्रकार, वकिल, अधिकारकर्मी, अनुसन्धानकर्तालगायत ३४ फेलोहरू सहभागी भएको उपाध्यक्ष वाकास हसनले जानकारी दिए ।

सम्मेलनमा विषय विज्ञ, प्राध्यापक, अनुसन्धानकर्ता, अभ्यासकर्ता र पैरवीकर्ताले इन्टरनेटको सही र जिम्मेवार प्रयोग, यसको नियमन तथा व्यवस्थापन, एआईको प्रयोगले भविष्यमा ल्याउनसक्ने अवसर र चुनौती तथा त्यसको व्यवस्थापन, साइबर सुरक्षा, तथ्यांक सुरक्षा, सामाजिक सञ्जालको प्रयोग, व्यवस्थापन र नियमन, भ्रामक र प्रायोजित सूचनाको विकृति, इन्टरनेटमा पछाडि पारिएका समुदायको पर्याप्त पहुँच र प्रयोगलगायत विषयमा गहन प्रस्तुति रहेको र सहभागीका बीचमा व्यापक छलफल भएको सम्मेलनमा नेपालकोतर्फबाट सहभागी पत्रकार जीवन भण्डारीले जानकारी दिए । सम्मेलनमा सहभागीले अन्य देशमा भइरहेका अभ्यास र अनुभवका आधारमा धेरै सिकाइ भएको पाकिस्तानकी सहभागी मार्यम रसिदले जानकारी दिए ।

सम्मेलनमा नेपालसहित भारत, बंगलादेश, म्यानमार, मलेसिया, भुटान, यमन, मंगोलिया, पाकिस्तान, कम्बोडिया, इन्डोनेसिया, काजकिस्तान, सिंगापुर फिलिपिन्स, भियतनाम, अस्ट्रेलिया, जापानलगायतका २० भन्दाबढी देशका फेलो तथा वक्ताहरू सहभागी भएको इन्टरनेट गभर्नेन्स इन्स्टिच्युटकी निर्देशक सपना शाहीले जानकारी दिइन् ।

सहभागीलाई समापन समारोहमा ललितपुर महानगरपालिकाका प्रमुख चिरीबाबु महर्जन र एसिया प्यासिफिक स्कुल अन इन्टरनेट गभर्नेन्सका अध्यक्ष बाबुराम अर्यालले प्रमाणपत्र प्रदान गरेका थिए ।