फरक फरक विशेषता देखाउने होडमा अटो व्यवसायी

अर्थतन्त्र चलायमान हुन्छ

- सचिव, नाडा अटोमोबाइल्स एसोसिएसन अफ नेपाल

१७औं संस्करणको नाटा अटो शो २०२५ आजबाट सुरु हुँदैछ । हामीले यसको सम्पूर्ण तयारी पूरा गरिसकेका छौं । अहिले बर्खायाम भएकाले दैनिक पानी परिरहेको हुँदा प्रदर्शनी स्थलहरूपमा पानी चुहिने समस्या नहोस् भनेर ‘वाटर प्रुफिङ’ गरेका छौं । 

भृकुटीमण्डप गेटबाट भित्र प्रवेश गर्ने बितिक्कै नै ‘वाटर प्रुफिङ’ गरेका छौं । भृकुटीमण्डप परिसरभित्र प्रवेश गरिसकेपछि नाडा शो हेर्न आउने अवलोकनकर्ता दर्शक तथा ग्राहकलाई पानी परेको बेलामा पनि कता गएर ओत लागौं भन्ने समस्या यसपटक नहुने गरि तयारी गरेका छौं ।

अटो शोको मंगलबार प्रधानमन्त्री केपी शर्मा ओलीले औपचारिकरूपमा उद्घाटन गर्ने कार्यक्रम छ । औपचारिक कार्यक्रम सकिएपछि सर्वसाधारणका लागि टिकट खुल्ला गरिनेछ । साँझ ६.३० बजेसम्म अवलोकनकर्ताले टिकट काटेर प्रदर्शनी स्थलमा प्रवेश गर्न सक्नेछन् । साँझ ७ बजेसम्म अटो शोका सो रुमहरू खुल्नेछन् ।

२ लाख भन्दा बढी अवलोकनकर्ता आउने सम्भावना रहेको छ । तर, हाम्रो तयारी र भृकुटीमण्डपको क्षमतालाई आधार मान्दा १ लाख भन्दा बढी अवलोकनकर्ता आउने छन् । नाडा शोमा दुई पांग्रे चार पांगे सवारी साधन प्रदशर्नीमा राखिँदैछ । यसपटक सवारी साधनका साथै अटो पार्टस् (गाडीमा लाग्ने उपकरण–अटो कम्पोनेन्टस्) का स्टलहरू पनि राख्दैछौं । अहिले नेपालमा गाडीका धेरै पार्टस् बनिरहेका छन् ।

नेपालमै उत्पादन भएका टायर, लुब्रिकेन्ट, ब्याट्री लगायतका अटो पार्टस्को प्रदर्शनीका लागि पनि स्टलहरू राख्दैछौं । यी बाहेक पनि नेपालमा उत्पादन भएका पार्टस् पनि प्रदर्शनीमा राखिनेछ । यसपटक गार्डेन एरियामा पूर्णरूपमा अटो कम्पोनेन्ट्का स्टलहरू राखिनेछ । अटो कम्पोनेन्ट्सको अवलोकनपछि मात्रै प्रदर्शनी हुने मुख्य हलमा प्रवेश गर्न सकिने गरी स्टलहरू राख्दैछौं ।

मुख्य हलमा चार पांग्रे विद्युतीय गाडीहरू प्रदर्शनीका लागि राखिनेछ । त्यसपछि आउने लाइनमा हेरिटेज भेइकलहरूका स्टलहरू राखिनेछ । हेरिटेज स्टलपछि कर्मसियल भेइकलको सेक्सन सुरु हुनेछ । त्यसपछि भने दुई पांग्रे सवारी साधनको स्टलहरू सुरु हुनेछन् ।

दुई पांग्रेपछि क्याफेट एरिया हुनेछ र त्यहाँबाट बाहिर निस्कने निकाश द्वार हुनेछ । यसपटक प्रदर्शनीमा १९ वटा सवारी साधन लन्च हुँदैछन् । जसमा १४ वटा लाइट कमर्सियल भेइकल छन् । ५ वटा दुई पांग्रे सवारी साधन लन्च हुँदैछन् । प्रदर्शनीमा ६० वटा स्टल कम्पोनेन्ट्सको स्टलहरू राख्दैछौं । यी स्टलहरू ४० वटा कम्पनीले लिएका छन् । शोको मुख्य आकर्षण विद्युतीय फ्लाइङ कार (उड्ने कार) र चार पांग्रे रोबोर्टस् रहने छन् ।

प्रदर्शनीमा राखिने उड्ने कार काठमाडौं ल्याइसकेका छौं । फ्लाइङ ट्याक्सीमा पाइलट चाहिँदैन । २ जना बस्न मिल्छ । यसलाई ड्रोन जसरी नै उडाउन सकिन्छ । अटोमोबाइल्स क्षेत्रमा नयाँ प्रविधि के के आइरहेको छ ? के कस्ता परिवर्तनहरू भइरहेका छन् भन्ने देखाउनका लागि उड्ने कारलाई अटो शोमा प्रदर्शनीमा राख्न लागेका छौं ।

उड्ने कारलाई प्रदर्शनीमा देखाउनका लागि मात्रै राखिनेछ । यो उडाएर देखाउन सरकारको अनुमति लिनुपर्ने हुन्छ । यो उड्ने कार ३० दिनका लागि धरौटीमा ल्याइएको हो । प्रदर्शनी सकिएपछि फिर्ता हुनेछ ।

नेपाली बजारमा अटोमोबाइल्स क्षेत्रमा अहिले विद्युतीय गाडीको ट्रेण्ड छ । हाम्रो प्रसारण प्रणालीमा उपलब्ध सबै विद्युत स्वच्छ ऊर्जा भएकाले पनि विद्युतीय गाडीको बजार बढिरहेको छ । अटो शो हरेक वर्ष आयोजना गर्दा अटोमोबाइल्स क्षेत्रको प्रवर्धन हुने गरेको छ । 

प्रदर्शनीमा नै धेरै ग्राहक आएर बुझ्ने तथा विभिन्न अफर पाउने हुँदा गाडीको बिक्रीसँगै बुकिङ बढ्ने गरेको छ । यसले देशको अर्थतन्त्र चलायमान बनाउन सहयोग पुग्ने गरेको छ ।

अटो शो पछि गाडीको बिक्री बढ्ने तथा बैंकमा कर्जा सुविधा लिएर गाडी खरिद गर्नेको संख्या बढ्ने र अर्थतन्त्र चलायमान बनाउन सहयोग पुग्ने अपेक्षा गरेका छौं । 

व्यवस्थापन चुस्त पारेका छौ ...

- कार्यसमिति सदस्य, नाडा अटोमोबाइल्स एसोसिएसन अफ नेपाल

अटो शोमा मुख्य आकर्षण नै उड्ने कार र रोबर्टस् हुनेछन् । यसबाहेक पनि धेरै ब्राण्डका नयाँ गाडी पहिलो पटक नेपाली बजारमा लन्च हुँदैछन् । ग्राहकको आकर्षण तथा चासो धेरै भएकाले गर्दा हाम्रो प्रदर्शनीस्थल केही सानो हुने हो कि भन्ने लागेको छ ।

सरकारले नै प्रदर्शनीका लागि फराकिलो नयाँ ठाउँ तोकिदिनु पर्ने माग हामीले गर्दै आएका छौं । तर, अहिलेसम्म सुनुवाइ भएको छैन । यसपटक सानै ठाउँ भए पनि ठूलोभन्दा ठूलो भीड नियन्त्रण हुने गरी नै अवलोकन गर्न सकिने व्यवस्था मिलाएका छौं । अटो शोको अवलोकनमा आउने महिलाका लागि पनि विशेष व्यवस्था गरेका छौं ।

भृकुटीमण्डप सबैका लागि सहज पहुँच भएको स्थान भएकाले हरेक प्रदर्शनी यही आयोजना हुँदै आएका छन् । तर, अवलोकनकर्ताको चाप हरेक वर्ष बढिरहेकाले यो ठाउँ अलि साँघुरो हुँदै गइरहेको छ । तर पनि यही स्थानलाई सही ढंगले व्यवस्थापन गरेर भूमिगत पार्किङ स्थल बनाएर जाने हो भने सही ढंगले व्यवस्थापन गर्न सकिन्छ । यहाँ आवश्यक संरचना विकास गरेर व्यवस्थित गर्ने हो भने सबै प्रकारका ठूला शोहरू यहाँ गर्न सकिन्छ ।

यहाँ पार्किङको केही असुविधा छ तर, यसपटक राइड सेयरिङ एपसँग सहकार्य गरेर आफ्नो सवारी साधनबाट नभइ राइड सेयरिङ एपबाट बुकिङ गरेर आउन सकिनेछ । हाम्रा पदाधिकारी पनि आफ्नो गाडी लिएर आउनुको सट्टा याङ्गोको ट्याक्सी चढेर आउने भन्ने कुरा छ ।

हामीले यसपटक पनि मानव जीवन रक्षाका लागि सहयोग पुर्‍याउने उद्देश्यले रक्तदान कार्यक्रम गर्दैछौं । बुधबार र बिहीबार रक्तदान कार्यक्रम हुने तय भइसकेको छ । बाँकी दिनमा पनि रक्तदान कार्यक्रम गर्ने सम्बन्धमा छलफल भइरहेको छ । सामाजिक उत्तरदायित्वअन्तर्गत ट्राफिक नियम पालना गर्न प्रवर्धन गर्न कार्यक्रम गरिनेछ । ट्राफिक प्रहरीलाई सम्मान गर्ने कार्यक्रम पनि हुनेछ ।

अवैध माध्यमबाट आउने स्पेयरपार्टस रोक्न पहल गर्छौं 

- केन्द्रीय उपाध्याक्ष तथा संयोजक, मधेश प्रदेश नाडा

काठमाडौ उपत्यका बाहिर पनि अटोमोबाइल्स क्षेत्रको विकास राम्रो भइरहेको छ । मधेश प्रदेशमा भारतीय सीमासँग जोडिएका जिल्लाका व्यापारीहरूको ठूलो समस्या ‘ग्रे च्यानल’बाट आयात भइरहेका स्पेयरपार्टसका कारण छ ।

सीमा क्षेत्रको जाँच सही ढंगले नहुँदा गैर कानूनीरूपमा भित्रने सामाग्रीको परिमाण बढिरहेको छ । सवारी साधनको पार्टस् चोरी पैठारी भएर आउने हुँदा व्यापारिकलाई मर्का परिरहेको छ । अटोमोबाइल्स क्षेत्रका लागि चर्को  भन्सार शुल्क र मूल्य अभिवृद्धि कर लगाइएको छ ।

यस्तो अवस्थामा चोरी पैठारीकै पार्टस्ले बजार लिइरहेको हुँदा ठूलो समस्या छ । हामीले यस सम्बन्धमा सम्बन्धित निकायमा बारम्बार जानकारी गराएका छौ तर, सुनुवाइ भएको छैन ।