वाल्डो क्यासिनोका अध्यक्ष पक्राउ

काठमाडौं – ठमेलस्थित छाया सेन्टरमा सञ्चालित क्यासिनो वाल्डो डाइनेस्टी इन्टरटेनमेन्टका अध्यक्ष चिनियाँ नागरिक च्यान मिन चिङ पक्राउ परेका छन् । क्यासिनो इभेन्टका नाउँमा चलिरहेको ‘हाइटेक ठगी’ अनुसन्धानका क्रममा प्रहरीले उनलाई पक्राउ गरेको हो ।

वाल्डो क्यासिनोमा धरपकड गर्दै ६ जनालाई पक्राउ गरेर जिल्ला प्रहरी परिसर काठमाडौंले गत बुधबार सार्वजनिक गरेको थियो । परिसरका प्रवक्ता एसपी पवनकुमार भट्टराईका अनुसार चिङलाई क्यासिनोमा हाइटेक ठगी प्रकरण अनुसन्धानका क्रममा नियन्त्रणमा लिइएको हो । यस प्रकरणअन्तर्गत प्रहरीले चार भारतीय र दुई नेपालीलाई पक्राउ गरिसकेको थियो, जसले क्यासिनोभित्र डमी खेलाडी व्यवस्थापन गरी वास्तविक ग्राहकलाई ठग्ने काम गरेको खुलेको थियो ।

प्रहरी अनुसन्धान अनुसार ठमेलस्थित वाल्डो क्यासिनोमा ‘क्यासिनो इभेन्ट’ को नाममा सञ्चालन हुने खेलहरूमा विशेष किसिमका उपकरण र खेल प्रणालीको प्रयोग गरी ग्राहकमाथि नियोजित रुपमा ठगी चलिरहेको थियो । खेलाडीका आँखामा विशेष लेन्स प्रयोग गरिने र तासमा म्याग्नेटिक चिप्स जडान गरी कार्डको पत्ता लगाउन मिल्ने बनाइएको थियो । यसरी बनाएको सिस्टमले खेलको परिणामलाई प्रभावित पार्ने र नक्कली जित/हराउने अवस्था सिर्जना गर्ने प्राविधिक तयारी गरिएको प्रहरीको प्रारम्भिक अनुसन्धानमा देखिएको छ ।

प्रहरीका अनुसार डिसेम्बर ११–१४ भारत तथा नेपालको विभिन्न व्यक्तिहरू मिलेर आयोजन गरिएको उक्त ‘क्यासिनो इभेन्ट’मा धेरै मानिसहरूले पैसा गुमाएका थिए। अनुसन्धानका क्रममा ५० भन्दा बढी प्याकेट म्याग्नेटिक कार्ड र करिब ४ सय विशेष लेन्स बरामद गरिएको छ, जसले ठगीको योजना निकै व्यवस्थित रूपमा गरिएको पुष्टि गर्छ ।