नेपाली नेताको नाममा पैसा उठाउने विदेशी पक्राउ

काठमाडौं — नेपालमा विभिन्न राजनीतिक नेता तथा व्यवसायीको नाम प्रयोग गरी चन्दा उठाउने अमेरिकी नागरिकलाई प्रहरीले पक्राउ गरेको छ । अमेरिकन नागरिक योङघो लीलाई अध्यागमन विभागले सोमबार काठमाडौंमा नियन्त्रणमा लिएको हो ।      

उनले चलाएको ‘एनआई कलेज डट ईडीयू डटएनपी’ नामक वेबसाइटमा पूर्वप्रधानमन्त्री, पूर्वमन्त्री, दलका नेता र व्यवसायीहरूको नाम राखेर रकम संकलन भइरहेको भेटिएपछि अनुसन्धान सुरु गरिएको विभागले जनाएको छ । विभागका निर्देशक टीकाराम ढकालका अनुसार लीलाई नियन्त्रणमा लिएर थप अनुसन्धान अघि बढाइएको छ । प्रारम्भिक अनुसन्धान अनुसार योङघो सन् २०११ देखि विभिन्न भिसामा नेपाल आउन– जाने गर्दै आएको र सन् २०२५ देखि व्यवसायिक भिसामा बस्दै आएको देखिएको छ ।      

अन्तर्राष्ट्रिय स्तरमा फण्ड संकलन गर्ने उद्देश्यले उनले कलेजको वेबसाइटमा राष्ट्रिय स्तरका नेताहरूलाई ‘हाम्रा डायनामिक टिम’ भनेर उल्लेख गरेका थिए ।            

वेबसाइटमा पूर्वप्रधानमन्त्री एवं एमाले अध्यक्ष केपी शर्मा ओली, कांग्रेस सभापति गगन थापा, पूर्वपरराष्ट्रमन्त्री आरजु राणा देउवा, एमाले सचिव एवं पूर्वमन्त्री महेश बस्नेत, कांग्रेस नेता तथा उद्योगपति विनोद चौधरीलगायत १३ जनाको नाम राखेर रकम संकलन गरिएको भेटिएको छ । यसबाहेक ‘पुस्तकालय, क्याम्पस सेवा तथा प्रशासनिक टिम’ भन्दै विभिन्न पेसा–व्यवसायमा संलग्न नेपालीहरूको नाम प्रयोग गरिएको पनि पाइएको विभागले जनाएको छ ।              

योङघो कोरियन स्टडिज, एआई सफ्टवेयर, इञ्जिनियरिङ तथा बिजनेस स्टडिज अध्यापन गर्ने बहानामा क्रिश्चियन धर्म प्रचारमा संलग्न थिए । उनले ‘कमसीड नेपाल प्रालि’ नामक कम्पनी दर्ता गरी चर्च प्लान्टिङ र सम्बन्धित गतिविधि सञ्चालन गरेको पाइएको छ । सन् २००८ मा न्यूयोर्कमा ‘यस इन हिम चर्च’ स्थापना गरी ‘द प्लान्टर’मार्फत चर्च विस्तार गरेका थिए । त्यसैगरी कोरियन मिसनरी संस्थामार्फत नेपालमा कोरियन भाषा विद्यालय खोल्ने योजना पनि रहेको पाइएको छ ।                

अनुसन्धानअनुसार उनी १२ वर्षमा ५० भन्दा बढी पटक नेपाल आएका छन् । वेबसाइटमा कलेजलाई त्रिभुवन विश्वविद्यालय र पोखरा विश्वविद्यालयबाट सम्बन्धन प्राप्त भएको दाबी भए पनि कुनै आधिकारिक प्रमाण पेस गर्न सकेका छैनन् । हाल उनीमाथि थप कानूनी प्रक्रिया र अनुसन्धान भइरहेको विभागले जनाएको छ ।