न्यूयोर्कको ट्राभल एण्ड एड्भेञ्चर शोमा नेपालको प्रवर्धन

काठमाडौं । नेपाल पर्यटन बोर्ड (एनटीबी)ले संयुक्त राज्य अमेरिकामा नेपालको पर्यटन प्रवर्धनलाई थप सुदृढ बनाउने उद्देश्यसहित न्यूयोर्कमा आयोजित ट्राभल एण्ड एड्भेञ्चर शो २०२६ मा सहभागिता जनाएको छ । कार्यक्रम जनवरी २४ र २५ मा आयोजना गरिएको हो ।

नेपालका लागि अमेरिका एक महत्वपूर्ण स्रोत बजार रहँदै आएको छ । सन् २०२५ मा १ लाख १२ हजार ३१६ अमेरिकी पर्यटक नेपाल आगमन गरेसँगै अमेरिका हाल नेपालको दोस्रो ठूलो पर्यटक स्रोत बजारका रूपमा रहेको छ । यही पृष्ठभूमिमा उत्तर अमेरिकी बजारमा लक्षित निरन्तर प्रचार– प्रसार कार्यक्रमअन्तर्गत नेपाल पर्यटन बोर्डले नेपाल पर्वतारोहण एजेन्सी संघ (टान) सँगको सहकार्यमा उक्त अन्तर्राष्ट्रिय पर्यटन मेलामा सहभागिता जनाएको हो ।

कार्यक्रममा एसियन हेरिटेज ट्रेक्स एण्ड ट्राभल्स, एक्सप्लोर भ्याकेसन, फ्रेन्ड्स एड्भेञ्चर टिम ट्रेकिङ एण्ड माउन्टेनियरिङ, हिमालयन ग्लेसियर एड्भेञ्चर एण्ड ट्राभल कम्पनी, नेपाल भिजन ट्रेक्स एण्ड एक्सपेडिसन्स तथा टच कैलाश ट्राभल्स एण्ड टुर्स गरी ६ वटा नेपाली पर्यटन कम्पनीले नेपालको विविध पर्यटन आकर्षण, साहसिक यात्रा, पर्वतारोहण र ट्रेकिङ सम्भावनाबारे जानकारी प्रस्तुत गरेका छन् ।

दुईदिने कार्यक्रममा सहभागी अमेरिकी पर्यटन व्यवसायी तथा यात्रुले नेपालको साहसिक पर्यटन उत्पादनप्रति विशेष चासो देखाएका छन् । विशेषगरी पर्वतारोहण र ट्रेकिङसम्बन्धी गतिविधिमा उल्लेखनीय रुचि देखिनुले नेपाललाई साहसिक पर्यटन गन्तव्यका रूपमा थप प्रवर्धन गर्न सहयोग पुगेको नेपाल पर्यटन बोर्डको विश्वास छ ।

साथै, यस सहभागिताले अमेरिकी पर्यटन व्यवसायीसँग पर्यटन सहकार्य विस्तार गर्नुका साथै ‘डेस्टिनेसन नेपाल’ को पहिचान मजबुत बनाउने उद्देश्य पूरा गर्न मद्दत पुगेको जनाइएको छ । कार्यक्रमको पहिलो दिन जनवरी २४ मा न्यूयोर्कस्थित नेपाली महावाणिज्य दूतावासका महावाणिज्यदूत दधिराम भण्डारीले नेपालको पेभेलियन अवलोकन गरी सहभागी कम्पनीहरूसँग अन्तरक्रिया गरे ।

कार्यक्रममा विशेषगरी पूर्वी तटीय अमेरिकी राज्यहरूमा नेपाल प्रवर्धनका सम्भावित सहकार्य क्षेत्रहरूबारे छलफल भयो । नेपाल पर्यटन बोर्डका तर्फबाट उदय भट्टराई र प्रदीप बस्नेतले कार्यक्रममा प्रतिनिधित्व गरेका थिए ।