बुढीगण्डकीमा लगानी गर्न निजी क्षेत्र तयार

काठमाडौं, माघ १५

नेपाल उद्योग वाणिज्य महासंघका अध्यक्ष चन्द्रप्रसाद ढकालले बुढीगण्डकी जलाशययुक्त जलविद्युत आयोजना निर्माण कार्य तत्काल अगाडि बढाउन सम्बन्धित पक्षलाई आग्रह गरेका छन् । धादिङ उद्योग वाणिज्य संघले आयोजना गरेको १०औँ धादिङ महोत्सवमा उनले लामो समयदेखि चर्चामा रहेको १२ सय मेगावाट क्षमताको बुढीगण्डकी जलाशययुक्त जलविद्युत आयोजना अगाडि बढाउनुपर्नेमा विशेष जोड दिए ।            

नेपालभरका उद्यमी, व्यवसायी तथा लगानीकर्ताको लगानीमा नेपाल डेभलपमेन्ट पब्लिक लिमिटेड (एनडीपी) कम्पनी स्थापना गरिएको र यस आयोजनामा स्रोतको कमी भएको भए निजी क्षेत्रको तर्फबाट यस कम्पनीमार्फत लगानी गर्न आफूहरू तयार रहेको उनले बताए ।                    

नेपालमा जलविद्युत विकासको अपार सम्भावना रहेको उनले बताए । अध्यक्ष ढकालले जलविद्युतको विकाससँगै यहाँका खनिज, कृषि उत्पादन तथा अन्य व्यवसायको सम्भावनालाई पनि थप उजागर गर्न सहयोग पुग्ने धारणा राखे ।                  

धादिङ जिल्लामा रहेका कुनै पनि सम्भावनाका क्षेत्रहरू जस्तैः खनिज, कृषि तथा अन्य कुनै पनि उद्यम, व्यवसायमा लगानी गर्न एनडीपी तयार रहेको उनले उल्लेख गरे । निजी क्षेत्रले कुनै पनि आयोजना तोकिएको समयमा, तोकिएको गुणस्तर र तोकिएकै बजेटमा सम्पन्न गर्ने गरेको उनले स्पष्ट पारे ।                

‘भदौको जेन–जी आन्दोलनका क्रममा निजी क्षेत्रका धेरै उद्योग, कलकारखाना, होटल तथा व्यावसायिक प्रतिष्ठानहरूमा आगजनी र क्षति भएको अवस्था थियो । तर, निजी क्षेत्रका धेरैजसोले अहिले ती व्यवसाय मर्मत, सम्भार र पुनर्निर्माण गर्दै सञ्चालनमा समेत ल्याई सकेका छौँ । निजी क्षेत्र कुनै पनि आयोजना तोकिएको समयमा, तोकिएको गुणस्तर र तोकिएकै बजेटमा सम्पन्न गर्ने गरेका छौँ,’ अध्यक्ष ढकालले भने ।                    

निजी क्षेत्रमाथि भएका धरपकड र निजी व्यवसायमाथि गरिएको प्रहारले निजी क्षेत्र भयभित भएको उनले बताए । ‘निजी क्षेत्रले उत्पादन गरेको छ । पूर्वाधार निर्माण गरेको छ । सेवा दिएको छ । रोजगारी सिर्जना गरेको छ । राजश्व तिरेको छ तर यो निजी क्षेत्र किन सधैँ उपेक्षित भएको हो ?’ उनले प्रश्न गरे ।                  

अध्यक्ष ढकालले स्थानीय रुपमा आयोजना गरिने मेला महोत्सवहरूले स्थानीय उत्पादनको प्रवर्धन तथा बजारीकरणमा उल्लेख्य भूमिका निर्वाह गर्ने बताए । यस्ता मेला महोत्सवहरूलाई महासंघले सदैव प्राथमिकतामा राख्ने गरेको उनले स्पष्ट पारे ।