सानिमा रिलायन्सद्वारा उत्कृष्ट कर्मचारी सम्मान

काठमाडौं । सानिमा रिलायन्स लाइफ इन्स्योरेन्स लिमिटेडले चालु आर्थिक वर्षको अर्धवार्षिक व्यावसायिक समीक्षा तथा कार्यसम्पादन मूल्यांकनका आधारमा उत्कृष्ट कर्मचारीलाई सम्मान गरेको छ । कम्पनीले मिट द च्याम्पियन्स कार्यक्रम पोखरा–चितवनस्थित एक होटलमा आयोजना गरेको हो । कार्यक्रमको उद्घाटन सञ्चालक समितिका अध्यक्ष रतनलाल केडियाले गरे । कार्यक्रममा प्रमुख कार्यकारी अधिकृत शिवनाथ पाण्डे, नायब प्रमुख कार्यकारी अधिकृत निराजन कँडेल लगायत उच्च व्यवस्थापन तथा विभिन्न तहका कर्मचारीहरूको सहभागिता थियो ।
अध्यक्ष केडियाले स्पष्ट लक्ष्य, प्रभावकारी रणनीति र अनुशासित कार्यान्वयनमार्फत चुनौतीपूर्ण आर्थिक अवस्था र मर्जरपछिको परिवेशमा पनि उल्लेखनीय उपलब्धि हासिल गर्न सकिने बताए । प्रमुख कार्यकारी अधिकृत पाण्डेले कम्पनीको प्रगति विवरण प्रस्तुत गर्दै प्रतिकूल लगानीमैत्री वातावरणका बाबजुद ३७.८०८ प्रतिशत लाभांश वितरण गर्न सफल भएको जानकारी दिए । उनले संस्थागत सफलता सामूहिक सहकार्यमा निर्भर रहने उल्लेख गरे ।
कार्यक्रममा विभिन्न विधामा उत्कृष्ट कार्यसम्पादन गर्ने क्षेत्रीय प्रबन्धक, एरिया म्यानेजर, शाखा तथा उपशाखा प्रमुखहरूलाई सम्मान गरिएको थियो । नायब प्रमुख कार्यकारी अधिकृत कँडेलले उत्कृष्ट ग्राहक सेवा र स्रोत–साधनको अधिकतम उपयोगमार्फत ग्राहक विस्तारमा जोड दिए । कम्पनीले डिजिटल सेवा विस्तार, दाबी प्रक्रिया सहजता र ग्राहक सम्पर्क प्रणाली सुदृढीकरणमार्फत देशभर १६९ शाखा सञ्जालबाट सेवा दिँदै आएको जनाएको छ । कम्पनीको चुक्ता पुँजी ५ अर्ब रुपैयाँभन्दा बढी पुगेको छ भने  लगानी २० अर्ब रुपैयाँ नाघेको छ ।