‘घृणा र उत्तेजनाले देश चल्दैन’

काठमाडौं । कांग्रेसका सभापति गगन थापाले मुलुकको नेतृत्व घृणा र उत्तेजना फैलाउनेहरूबाट सम्भव नभएको बताएका छन् । काठमाडौंको निर्वाचन क्षेत्र नम्बर १० का लागि कीर्तिपुरमा आइतबार आयोजित चुनावी सभालाई सम्बोधन गर्दै उनले देश चलाउन संयम र टिमवर्क आवश्यक हुने बताए ।
उपत्यकाका विभिन्न स्थानमा एकै दिन चुनावी सभा गरेको कांग्रेसले शीर्ष नेताको सम्बोधनको क्रमलाई बाँडफाँट गर्दा थापाले ४, ५, ६ र १० नम्बर क्षेत्रको चुनावी सभालाई पनि सम्बोधन गरेका हुन् । 
काठमाडौंका मतदाता उत्तेजना र हिंसाको राजनीतिको पक्षमा नउभिने दाबी गर्दै सभापति थापाले यसपटक काठमाडौंमा कांग्रेसका उम्मेदवारका पक्षमा मतदान गर्ने विश्वास व्यक्त गरे । 
निर्वाचनमा उम्मेदवारहरूबीच एजेन्डा र भिजनमा आधारित स्वस्थ बहस हुने अपेक्षा गरेको भए पनि अहिलेको राजनीति त्यसतर्फ नगएकामा चिन्ता पनि व्यक्त गरे । सामाजिक सञ्जालमा भाइरल हुनका लागि प्रयोग गरिने उत्तेजक भाषाले देश नबन्ने उनको भनाइ छ । उनले भने, ‘संसारभर कोलाहल मच्चाउनेहरू भाइरल त हुन्छन्, तर देश सम्हाल्न सबैलाई मिलाएर लैजाने क्षमता चाहिन्छ ।’
थापाले कार्यकर्ताहरूलाई चुनावी प्रचारका क्रममा विपक्षीमाथि व्यक्तिगत आक्रमण वा घोचपेच नगर्न निर्देशन दिँदै आफ्ना एजेन्डा र सिद्धान्त जनतामाझ लैजान आग्रह गरे । कांग्रेसले निर्वाचनका लागि ल्याएको ‘प्रतिज्ञापत्र’लाई नै मुख्य आधार बनाएर मत माग्न उनले आग्रह गरे ।  
चुनावी सभालाई पनि सम्बोधन गर्दै उनले अब देशलाई सम्हाल्ने शक्ति कांग्रेस बन्ने दाबी गरे । ‘हाँक्नेले सुझबुझ पु¥याएन भने गाडी पल्टिन्छ, दुर्घटना हुन्छ । नेपालले अब अर्को दुर्घटना बेहोर्न सक्दैन,’ उनले भने,‘हामीसँग समयको सुविधा छैन । हामीसँग क्षमता पनि छैन । हामीले सम्हाल्नुपर्नेछ । त्यो सम्हाल्ने शक्ति नेपाली कांग्रेस हो । जसले यो पाँच वर्षको समयमा कांग्रेसको नयाँ नेतृत्वले एउटा कार्यकर्तालाई निराश नबनाउने मात्र होइन, एउटा नागरिकलाई पनि निराश बन्न दिँदैन । किनकि आजभन्दा भोलि राम्रो हुँदैछ भन्ने विश्वास स्थापित गर्नेछौं ।’ 
काठमाडौं–४ मा कांग्रेसबाट सचिन तिमल्सिना, ५ मा महामन्त्री प्रदीप पौडेल, ६ मा सबुज बानियाँ र ७ नम्बर क्षेत्रमा प्रमोदहरि गुरागाईं उम्मेदवार छन् । 
आइतबारै काठमाडौं २, ५, ६ र ७ भएका सभालाई उपसभापति विश्वप्रकाश शर्माले सम्बोधन गरे । उनले नाम नलिई नयाँ राजनीतिक दलहरूतर्फ संकेत गर्दै सामाजिक सञ्जालमा भाइरल हुनु र देश चलाउनु फरक कुरा भएको बताए । ‘देश चलाउन अनुभव, धैर्य र स्पष्ट नीति चाहिन्छ, जुन कांग्रेससँग मात्र छ,’ उनले भने । चुनावी प्रतिस्पर्धालाई शत्रुताका रूपमा नलिन कार्यकर्ताहरूलाई आग्रह गर्दै स्वस्थ लोकतान्त्रिक अभ्यासमा केन्द्रित हुन शर्माले पनि निर्देशन दिए । 
‘भ्रष्टाचारको अन्त्य र स्थिर सरकार हाम्रो पहिलो प्राथमिकता हो । अबको ५ वर्ष मुलुकलाई विकासको बाटोमा हिँडाउन कांग्रेसले स्पष्ट खाका (प्रतिज्ञापत्र) ल्याएको छ, त्यसैलाई जनताको घरदैलोमा पु-याउनुस्,’ उनले भने ।