सन्तनेता भट्टराईको १५औँ स्मृति दिवस मनाइयो

काठमाडौँ  । सन्तनेता कृष्णप्रसाद भट्टराईको १५औँ स्मृति दिवसका अवसरमा ‘सन्तनेता कृष्णप्रसाद भट्टराई केन्द्र’ले उनीप्रति श्रद्धाञ्जली अर्पण गरेको छ । केन्द्रका अध्यक्ष लोकेश ढकालद्वारा जारी विज्ञप्तिमा नेपाली कांग्रेसका संस्थापक, पूर्वसभापति तथा पूर्वप्रधानमन्त्री भट्टराईको लोकतान्त्रिक आन्दोलन र राष्ट्र निर्माणमा पु¥याएको योगदानको स्मरण गरिएको छ ।
वि.सं. १९८१ पुस ८ गते भारतको बनारसमा जन्मनुभएका भट्टराई नेपालको प्रजातान्त्रिक आन्दोलनका अग्रणी नेता मानिन्छन् । उनले बनारस हिन्दू विश्वविद्यालयबाट स्नातक पूरा गरेका थिए भने भारतको स्वतन्त्रता आन्दोलन, विशेषतः सन् १९४२ को ‘भारत छोड’ आन्दोलनमा सक्रिय सहभागिता जनाउँदै पहिलो पटक जेल परेका थिए ।
भट्टराई नेपाली राष्ट्रिय कांग्रेस गठन (२००३)का संस्थापक महामन्त्री हुनुका साथै २००७ सालको जनक्रान्तिमा सक्रिय भूमिका निर्वाह गरेका थिए । २०१७ सालमा राजा महेन्द्रले प्रजातन्त्र अपहरण गरेपछि उनलाई पनि गिरफ्तार गरिएको थियो र प्रजातन्त्रका लागि करिब १४ वर्ष जेल जीवन बिताएका थिए ।
२०४६ सालको जनआन्दोलनपछि प्रजातन्त्र पुनःस्थापनामा उनले नेतृत्वदायी भूमिका खेलेका थिए । त्यसपछि उनी अन्तरिम सरकारको प्रधानमन्त्री बनेका थिए । उनकै नेतृत्वमा २०४७ सालको संविधान जारी भई निर्धारित समयभित्र संसदीय निर्वाचन सम्पन्न भएको थियो ।
भट्टराई सादगी, नैतिक राजनीति र गान्धीवादी सिद्धान्तका अनुयायी नेताका रूपमा परिचित थिए । भ्रष्टाचाररहित राजनीतिक जीवन र सरल जीवनशैलीका कारण नेपाली राजनीतिमा उनले विशिष्ट स्थान बनाउन सफल भएको केन्द्रका अध्यक्ष ढकालद्वारा जारी विज्ञप्तिमा उल्लेख गरिएको छ ।

वि.सं. २०६७ फागुन २० गते काठमाडौँमा उनको निधन भएको थियो । विज्ञप्तिमा उनको आदर्श, सिद्धान्तनिष्ठ राजनीति र लोकतान्त्रिक मूल्यमान्यताबाट प्रेरणा लिन आजको पुस्तालाई आह्वान गरिएको छ ।