निर्वाचन प्रहरीलाई आयमूलक काममा लगाउने पहल

काठमाडौं । प्रतिनिधि सभा सदस्य निर्वाचनमा धनकुटामा सुरक्षाका लागि खटिएका निर्वाचन प्रहरीलाई विभिन्न सिपमूलक तालिममा सहभागी गराउने तयारी गरिएको छ ।
निर्वाचन प्रहरीलाई आयआर्जन र उद्यम विकाससँग जोड्ने उद्देश्यले प्राविधिक शिक्षा तथा व्यावसायिक तालिम परिषद् (सिटिइभिटी) तथा घरेलु तथा साना उद्योग कार्यालय धनकुटासँगको समन्वयमा तालिममा सहभागी गराउने योजना अगाडि सारिएको हो ।
धनकुटाका प्रमुख जिल्ला अधिकारी विनोदकुमार खड्काले जनाए अनुसार निर्वाचनमा खटिएका ९८९ निर्वाचन प्रहरीलाई खाली हात घर फर्काउनुभन्दा जीविकोपार्जनमा सहयोग पुग्ने सिप सिकाएर पठाउने उद्देश्यले विभिन्न सिपमूलक तालिममा सहभागी गराउन लागिएको हो ।
शिक्षालय तथा घरेलु कार्यालयसँग छलफल गरी होटेल व्यवस्थापन, प्लम्बिङ, इलेक्ट्रिसियन, फर्निचर तथा मुढा बनाउनेलगायतका तालिम सञ्चालन गर्ने प्रस्ताव गरिएको उनले बताए । उनीहरूलाई तालिममार्फत घरेलु उद्यमका सम्भावना, उद्योग स्थापना प्रव्रिmया, लगानी व्यवस्थापन तथा व्यवसाय सञ्चालनका मोडेलबारे समेत जानकारी दिइने बताइएको छ ।
यस्तै बैंक तथा वित्तीय संस्थासँग सहकार्य गरी तालिम प्राप्त निर्वाचन प्रहरीलाई सहुलियतपूर्ण घरेलु उद्यम कर्जासँग जोड्ने तयारीसमेत रहेको छ । निर्वाचनमा खटिएका इच्छुक निर्वाचन प्रहरीलाई छनोटका आधारमा तालिम प्रदान गरिने जनाइएको छ । 
निर्वाचनमा खटिएकामध्ये पनि पाँच सय जनाले मात्रै तालिम लिए भने पनि करिब दुई हजार पाँच सय परिवारका लागि सानोतिनो आम्दानीको बाटो खुल्ने उनको भनाइ छ । तालिमपछि गाउँघरमा नै रोजगारीका सिर्जना गर्न सक्ने क्षेत्रलाई प्राथमिकता दिइएको जनाइएको छ ।
यस्तै तालिमबाट कृषि तथा पशुपालनतर्फ उनीहरूलाई आकर्षित गर्ने योजना बनाइएको छ भने कुखुरापालन, बाख्रापालन, च्याउ खेती, तरकारी खेती, मौरीपालन जस्ता कामबाट सानो लगानीमा घरमै धेरै आम्दानी गर्न सकिने सम्भावनाबारे जानकारी दिइने छ ।
निर्वाचन प्रहरीलाई दीर्घकालीन रूपमा उपयोगी हुने सिप प्रदान गर्ने उद्देश्यले कार्यव्रmम अघि सारिएको जिल्ला प्रहरी कार्यालय धनकुटाका प्रहरी उपरीक्षक शरतकुमार थापा क्षेत्रीले बताए । अध्ययन गर्न चाहने अध्ययन गर्छन् साथै विदेश जान चाहने विदेश जान्छन् र नेपालमै बसेर केही गर्छु भन्नेलाई गाउँमै बसेर सानो उद्योग वा व्यवसाय गर्न चाहनेलाई सीप सिकाउन सकियो भने त्यसले उनीहरूको भविष्यमा ठुलो सहयोग पुग्ने विश्वास उनले व्यक्त गरे ।
धनकुटाको यो प्रयास साह्रै नै सराहनीय भएको र यस्तै पहल अन्य पालिका र निकायले पनि लिनुपर्ने कृषिविज्ञ शिवबहादुर नेपाली प्रधानले बताए । ‘समाजमा आर्थिक र सामाजिक योगदान दिन सक्ने योग्य व्यक्तिले उत्पादनशील काममा लाग्न यो एउटा राम्रो पहल हुनसक्छ,’ नेपाली भन्छन्, ‘हाम्रोमा यसै पनि बाँझो जमिन बढ्ने क्रम बढेको छ । त्यसलाई कम गर्न पनि पूर्वा सुरक्षाकर्मीहरुलाई जग्गा भाडामा लिएर सामूहिक खेती गर्न सकिँदा पनि आर्थिक–सामाजिक रुपान्तरण हुन सक्छ ।’
नेपालको पहिलो पुस्ताका बागवानीविद् नेपालीले नेपालको माटोमा बीय यत्तिकै फालिदिँदा पनि राम्रो उब्जाउ हुने माटो र मौसम भएकाले देशका योग्य जनशक्तिलाई सकेसम्म धेरै कृषिमा नै लगाउनु उपयुक्त हुने धारणा सुझाए । ‘अहिले दिन लागिएको सिटिभिटी तालिम पनि राम्रो हो तर त्यसलाई कृषि र खेतीको खाकामा ढाल्न सकिने हो भने अझ राम्रो हुन सक्छ । यसमा पालिकाहरुले पहल गर्न सक्छन्,’ उनले बताए । नेपालको जनसंख्याको औसत उमेर करिब २६ वर्ष छ भने कुल जनसंख्याको ४२.५ प्रतिशत युवावर्गले ओगटेको बताउँदै उनले नेपालमा केही भएन भनेर गुनासो मात्र गरिरहनु भन्दा यस्ता सानातिना प्रयास र पहललाई निरन्तर जारी राख्दा समाजमा क्रमिक रुपमा परिवर्नतन आउँदै जाने बताए ।