राहदानी वितरण अवरुद्ध हुनसक्ने, चाहिएकालाई लिइहाल्न विभागको अनुरोध

काठमाडौं । राहदानी विभागले आगामी जेठ महिनादेखि राहदानी वितरण प्रणालीलाई नयाँ प्रणालीमा लैजाने भएको छ । नयाँ प्रणालीमा लैजाँदा स्भाविक रुपमा केही न केही गतिरोध आउने र सम्भावित प्राविधिक त्रुटि आउने हुँदा राहदानी वितरण केही समय असहज हुन सक्ने विभागले सूचित गराएको छ ।
नयाँ प्रणाली कार्यान्वयनमा ल्याएपछि उक्त प्रणाली पूर्ण क्षमतामा नियमित रूपमा सञ्चालन हुन १ देखि ३ महिनासम्म लाग्न सक्ने विभागद्वारा जारी विज्ञप्तिमा उल्लेख छ । जेठ महिनादेखि राहदानी सेवामा केही समयका लागि समस्या आउन सक्ने भएकाले आवश्यक भएकालाई अहिले राहदानी बनाउन पनि विभागले आग्रह गरेको छ ।
विभागका महानिर्देशक तीर्थराज अर्यालले दुई महिनापछाडि आउन सक्ने समस्याबारे पूर्वसूचित गर्न खोजिएको बताए । ‘नयाँ प्रणालीमा स्वाभाविक रूपमा केही समस्या आउँछन् ।  पूर्ण गतिमा काम गर्न केही समय लाग्न सक्छ,’ अर्यालले भने । 
हाल राहदानीको मौज्दात पर्याप्त रहेको र सहजताका साथ वितरण भइरहेकाले पछि राहदानी बनाउने योजनामा रहेकाहरूले अहिले लिँदा राम्रो हुने विभागले जनाएको छ । सरकारले आगामी ५ वर्षलाई पुग्ने गरी ६४ लाख प्रति विद्युतीय राहदानी आपूर्ति प्रक्रिया गत वर्ष नै सुरु गरेको थियो । गत वर्ष आह्वान गरिएको अन्तर्राष्ट्रिय बोलपत्रबाट जर्मनीका दुई कम्पनी छनोट भइसकेका छन् । राहदानी पूर्वदर्ता, दर्ता, तथ्यांक व्यवस्थापन एवं वितरणसहितको राहदानी प्रणालीको प्याकेज १ को टेन्डर जर्मन कम्पनी म्युबाउरले पाएको थियो । त्यस्तै, वैयक्तीकरण, गुणस्तर नियन्त्रण तथा प्याकिङसहितको राहदानी पुस्तिका आपूर्तिको प्याकेज २ को ठेक्काका लागि जर्मनीकै भेरिडोज कम्पनी छानिएको थियो । हाल फ्रान्सेली कम्पनी आइडेमियाले राहदानीको आपूर्ति गर्दै आएकाले उसकै प्रविधि तथा प्रणालीबाट काम भइरहेको छ ।
पुरानो कम्पनीले गरिरहेको कामलाई नयाँमा सिस्टममा लैजाँदा केही समय लाग्न सक्ने जनाइएको छ । पुराना प्रणालीबाट वितरण हुने गरी अहिले चार लाख राहदानी मौज्दात रहेकाले त्यो सकिएपछि मात्रै नयाँ प्रणालीबाट वितरण गर्ने योजना विभागको छ । पुरानो मौज्दात सकिएपछि ठेक्का सम्झौता भएको नयाँ कम्पनीको प्रविधि, उपकरण तथा प्रणालीबाट राहदानीको वितरण सुरु हुनेछ ।
राहदानीको अभाव हुन थालेपछि गत मंसिरमा विभागले पुरानै आपूर्तिकर्तासँग ७ लाख राहदानी खरिद गरेको थियो । ठेक्का पाएका नयाँ जर्मन आपूर्तिकर्ताले मार्च महिनाबाट काम थाल्नेछ ।
नयाँ प्रणालीमा जाँदा सुरुवाती दिनमा जिल्ला÷इलाका प्रशासन तथा विदेशस्थित नेपाली नियोगबाट आवेदन दिएकाको राहदानी तयार हुन अहिलेको भन्दा बढी समय लाग्ने भएकाले पूर्वसूचित गरिएको विभागले जनाएको छ । नयाँ सिस्टममा जाँदा जिल्ला÷इलाका प्रशासन तथा विदेशस्थित नियोगबाट प्रदान गरिने राहदानी सेवा एकदेखि तीनहप्तासम्म तथा विभागको सेवा पनि एक हप्तासम्म बन्द हुन सक्ने विभागले विज्ञप्तिमार्फत उल्लेख गरेको छ ।