बारुदी सुरुङ खोज्ने मुसाको सम्मानमा शालिक

नोम्पेन्ह । वीरताका लागि स्वर्ण पदकबाट सम्मानित एक प्रख्यात बारुदी सुरुङ खोज्ने मुसाको सम्झनामा विश्वकै पहिलो ‘ल्यान्डमाइन डिटेक्टिङ’ मुसाको शालिक बनाइएको छ ।
आठ वर्षसम्म बाँचेको मागावा नामक मुसाले सन् २०१६ मा सुरु भएको आफ्नो पाँच वर्षे कार्यकालमा कम्बोडियामा १०० भन्दा बढी बारुदी सुरुङ र अन्य विस्फोटक पदार्थहरू फेला पारेको थियो ।
कम्बोडियाको सिएम रिपमा स्थानीय कलाकारहरूले ढुंगाबाट खोपेर बनाएको उक्त मुसाको शालिक शुक्रबार सार्वजनिक गरियो । यो अनावरण अप्रिल ४ मा मनाइने अन्तर्राष्ट्रिय खानी सचेतना दिवसको अवसर पारेर गरिएको हो ।
संयुक्त राष्ट्रसङ्घका अनुसार कम्बोडियामा बारुदी सुरुङ अझै पनि ठूलो जोखिमका रूपमा रहेको छ । त्यहाँ १० लाखभन्दा बढी मानिसहरू अहिले पनि बारुदी सुरुङ र नपड्किएका विस्फोटक पदार्थहरू भएको जोखिमयुक्त जमिनमा बसोबास र काम गरिरहेका छन् ।
‘अफ्रिकन जायन्ट पाउच्ड’ प्रजातिको मागावालाई बेल्जियमको परोपकारी संस्था अपोपोले तालिम दिएको थियो । त्यसपछि उनलाई सन् २०१६ मा बम सुँघ्ने काम सुरु गर्न कम्बोडिया लगिएको थियो ।
विस्फोटक पदार्थमा हुने रासायनिक मिश्रण पत्ता लगाउन सक्ने आफ्नो तीव्र सुँघ्ने शक्ति र तालिमको प्रयोग गर्दै मागावाले बारुदी सुरुङ भेटिएपछि आफ्ना सञ्चालकहरूलाई संकेत दिन्थे । त्यसपछि ती सुरुङहरूलाई सुरक्षित रूपमा हटाउने गरिन्थ्यो ।
आफ्नो सेवा अवधिमा मागावाले १ लाख ४१ हजार वर्ग मिटर भन्दा बढी जमिन सुरक्षित बनाएका थिए । जुन २० वटा फुटबल मैदान बराबरको क्षेत्र हो । उनले टेनिस कोर्ट जत्रो क्षेत्र मात्र २० मिनेटमा खानतलासी गर्न सक्थे । बीबीसी