रोबोटले दौडमा उछिन्यो मानव कीर्तिमान

बेइजिङ (एपी)– दौड प्रतियोगितामा सहभागी रोबोटले प्रविधिको युग नयाँ चरणमा प्रवेश गरेको संकेत दिएका छन् । चीनको राजधानी बेइजिङमा आइतबार आयोजित ह्युमनोइड रोबोटहरूको हाफ–म्याराथन प्रतियोगितामा एउटा रोबोटले मानव विश्वरेकर्डभन्दा छिटो दौड पूरा गर्दै आश्चर्यचकित बनाएको छ ।
चिनियाँ स्मार्टफोन कम्पनी अनरद्वारा विकसित उक्त रोबोटले २१ किलोमिटर दूरी मात्र ५० मिनेट २६ सेकेन्डमा पार ग¥यो । यो समय युगाण्डाका धावक ज्याकोब किप्लिमोले कायम गरेको हाफ–म्याराथन विश्वरेकर्ड (करिब ५७ मिनेट) भन्दा पनि छिटो हो ।
गत वर्ष पहिलोपटक भएको यस्तो प्रतियोगितामा विजेता रोबोटले २ घण्टा ४० मिनेटभन्दा बढी समय लगाएको थियो । यस वर्षको प्रदर्शनले रोबोट प्रविधिमा अत्यन्तै ठूलो प्रगति भएको देखाएको छ ।
प्रतियोगितामा केही समस्या पनि देखिए । कतिपय रोबोट सुरुमै लडे भने केहीले बाटोमा अवरोधमा ठोक्किने समस्या झेले । तर समग्रमा प्रदर्शन प्रभावशाली रह्यो । करिब ४० प्रतिशत रोबोटहरूले स्वचालित रूपमा मार्ग तय गरेका थिए भने बाँकीलाई टाढाबाट नियन्त्रण गरिएको थियो । अनरका इन्जिनियर डु जाओदीका अनुसार रोबोटलाई उत्कृष्ट मानव खेलाडीहरूको आधारमा डिजाइन गरिएको हो । यसको खुट्टा करिब ९५ सेन्टिमिटर लामो छ र यसमा शक्तिशाली ‘लिक्विड कूलिङ’ प्रणाली प्रयोग गरिएको छ, जसले लामो दूरीसम्म स्थिर प्रदर्शन गर्न मद्दत गर्छ ।
रोबोटका इन्जिनियरहरूका अनुसार यसको डिजाइन उत्कृष्ट मानव धावकबाट प्रेरित छ । यस्तो प्रविधि भविष्यमा उद्योग क्षेत्रमा प्रयोग हुने सम्भावना रहेको बताइएको छ ।
दर्शकहरूले यसलाई मान्छेभन्दा अगाडि बढ्ने प्रविधिको संकेतका रूपमा व्याख्या गरेका छन् । धेरैको भनाइमा यो उपलब्धिले रोबोट र मानवबीचको प्रतिस्पर्धा अब वास्तविक बनेको देखाएको छ ।
चीनले प्रविधिलाई रणनीतिक प्रतिस्पर्धाको मुख्य क्षेत्र बनाउँदै आएको छ । पछिल्लो योजनाअनुसार ह्युमनोइड रोबोटजस्ता उन्नत प्रविधिको विकासलाई उच्च प्राथमिकता दिइएको छ ।
अन्तर्राष्ट्रिय प्रतिवेदनअनुसार एजिबोट, युनिट्री रोबोटिक्स र यूबीटेक रोबोट्स जस्ता चिनियाँ कम्पनीहरू अहिले विश्वका अग्रणी रोबोट उत्पादकका रूपमा उभिएका छन्, जसले हजारौं रोबोट उत्पादन गरिरहेका छन् । प्रतियोगिताले रोबोट प्रविधि अब केवल प्रयोगशालामा सीमित नरही मानव क्षमतासँग प्रत्यक्ष प्रतिस्पर्धा गर्ने स्तरमा पुगेको स्पष्ट संकेत दिएको छ ।