सांसद खड्का संसद बैठकमै ढले

काठमाडौं । कांग्रेसका सांसद तथा लेखा समितिका सभापति भरत खड्का बिहीबार प्रतिनिधिसभा बैठक चलिरहेकै बेला ढलेका छन् । खड्का ढलेलगत्तै सांसद सोम शर्मालाई बोल्न रोकेर सभामुख डीपी अर्यालले केहीबेर सदनको कारबाही स्थगित गरेका थिए । 
डोटीका निर्वाचित सांसद खडकालाई उच्च रक्तचापका कारण चक्कर आएर कुर्सीबाट ढलेको बताइएको छ । संसद्बाट उपचारार्थ वीर अस्पताल लगिएका उनको स्वास्थ्यमा सुधार आएको सांसद उर्मिला थपलियाले बताइन् । 
यसैबीच प्रतिनिधिसभाको बैठक आगामी बुधबारसम्मका लागि स्थगित भएको छ । बिहीबार बसेको बैठकपछि अर्को बैठक भदौ २४ गते मात्रै बस्ने सभामुख अर्यालले जानकारी गराए ।