बाढीमा फसेका ११४ नेपाली तातोपानी नाका हुँदै फर्किए

सिन्धुपाल्चोक । भोटेकोशी बाढीले चिनियाँ भूभागतर्फ अलपत्र ११४ जना नेपाली केरुङ क्षेत्रबाट बिहीबार तातोपानी नाका हुँदै स्वदेश फर्किएका छन् ।
तातोपानी अध्यागमन कार्यालयका प्रमुख पदमराज तिमल्सिनाका अनुसार पारि सुरक्षित रहेका उनीहरुलाई चिनियाँ पक्षले राहदानी विवरणसहित तातोपानी नाकाको लिपिङ क्षेत्रमा ल्याएर जिम्मा लगाएको हो । ‘चिनियाँ प्रतिनिधिले तातोपानी नाकाको लिपिङ क्षेत्रमा ल्याएर हाम्रो जिम्मा लगाएका हुन्,’ उनले भने । 
प्रमुख जिल्ला अधिकारी शशीधर घिमिरेका अनुसार अहिले तातोपानी भन्सार बन्द रहे पनि पर्यटक आउजाउका लागि नाका खुुला छ । नेपाल फर्किनेमा अधिकांश सिन्धुपाल्चोक, नुवाकोट र रसुवा जिल्लाका रहेको जनाइएको छ । अस्थायी पास लिएर केरुङ पुगेका नेपालीलाई फर्काइएको ल्हासास्थित नेपाली महावाणिज्य दूतावासले जनाएको छ । रसुवागढी नाकाबाट केरुङसम्म सामान लिन, लोड–अनलोडको काम गर्न तथा होटेल तथा रेस्टुराँमा काम गर्न जाने नेपालीले भिसा लिनुनपर्ने व्यवस्था छ ।
रसुवागढी नाका र पासाङल्हामु राजमार्ग बाढीका कारण कटानमा परेपछि अस्थायी पास लिएर केरुङ पुगेका नेपाली अलपत्र परेका थिए । महावाणिज्यदूत लक्ष्मीप्रसाद निरौलाका अनुसार उनीहरुलाई तातोपानी नाकासम्म पु¥याउन चीनले सहजीकरण गरेको छ । अस्थायी अनुमति लिएर काम वा किनमेलका लागि जाने नेपाली तिब्बततर्फ ३० किलोमिटर भित्रसम्म मात्रै जान पाउँछन् । आफूसँग राहदानी र भिसा नभएका बाढीपछि तिब्बतमा अलपत्र परेका नागरिकलाई नेपाल फर्किन चीन सरकारले सहयोग गरेको महावाणिज्यदूत निरौलाले बताए । 

नेपाली महावाणिज्यदूतका अनुसार केरुङमा करिब एक हजार ६ सय जना नेपाली रहेको अनुमान छ । तीमध्ये नेपाल फर्किनका लागि ८ सय जनाले नाम टिपाएका छन् । ‘धेरैजसो सामान लिन आएका, किनमेलका लागि आएका र लोड–अनलोडको काममा आएकाहरु छन्,’ निरौलाले भने । 
भोटेकोशी नदीमा गएको बाढीपछि उक्त क्षेत्रमा रहेका नेपाली नागरिक प्रभावित भएका छन् । केही अझै सम्पर्कविहीन छन् भने चीनतर्फ सुरक्षित अवस्थामा रहेका नेपालीलाई स्वदेश फर्काउने प्रक्रिया अघि बढाइएको छ । बाढीपछि सम्पर्कविहीन रहेका सिन्धुपाल्चोकका २३९ जनाको अवस्था अझै अज्ञात छ । उनीहरूको खोजीमा आफन्त तथा सम्बन्धित निकाय लागिपरेका छन् ।

१२ हजार ३८ जनाको उद्धार 
विनाशकारी बाढीबाट प्रभावित १२ हजार जनाभन्दा बढीको उद्धार गरिएको छ । घटनामा मृत्यु भएकामध्ये एक हजार २८२ जनाको शव फेला परेको छ । रसुवा, नुवाकोट, धादिङ, चितवन, गोरखा, तनहुँ, नवलपरासी पूर्व र नवलपरासी पश्चिम (भारतमा भेटिएकासहित) एक हजार २८२ शव फेला परेका नेपाल प्रहरीका प्रवक्ता अबिनारायण काफ्लेले बताए । 
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको विवरणअनुसार बाढीमा परी ५ हजार ८३ जना अझै सम्पर्कविहीन छन् । प्रभावित क्षेत्रबाट हालसम्म १२ हजार ३८ जनाको उद्धार गरिएको प्राधिकरणका प्रवक्ता शान्ति महतले जानकारी दिइन । उनका अनुसार तीन हजारभन्दा बढी होल्डिङ सेन्टर बसिरहेका छन् । 
२१ हजार ४०२ जना सुरक्षाकर्मी खोज तथा उद्धार कार्यमा खटिएका छन् । बाढीमा परी घाइते भएका ३०४ जनाको विभिन्न अस्पतालमा उपचार भइरहेको छ । सेनाले ३ हजार २०६ जना र सशस्त्र प्रहरीले एक हजार ८७४ जनालाई स्वास्थ्य उपचार सेवा दिएको प्राधिकरणले जनाएको छ ।