राजनीति

गृह मन्त्रालयद्वारा २३ उच्च अधिकारीको सरुवा

सात जिल्लाका सिडिओ पनि फेरिए

न्यूज २४ दैनिक

शुक्रबार, भदौ १९, २०८३ २१:१७

गृह मन्त्रालयद्वारा २३ उच्च अधिकारीको सरुवा

काठमाडौँ । सरकारले गृह प्रशासनअन्तर्गतका १४ जना सहसचिव र ९ जना उपसचिव गरी २३ जना अधिकारीहरूको व्यापक सरुवा तथा पदस्थापन गरेको छ।

शुक्रबार भएको मन्त्रीस्तरीय निर्णयअनुसार झापा, सुर्खेत, बारा, गोरखा, रौतहट, दोलखा र पर्वतसहितका विभिन्न जिल्लाहरूमा प्रमुख जिल्ला अधिकारी (सिडिओ) फेरिएका छन्।

मन्त्रालयको नयाँ निर्णयअनुसार झापाको प्रमुख जिल्ला अधिकारीको जिम्मेवारी श्रवणकुमार पोखरेललाई दिइएको छ भने झापामा कार्यरत शिवराम गेलाललाई गृह मन्त्रालयमा तानिएको छ। त्यसैगरी, सुर्खेतमा महेन्द्रकुमार सापकोटा, बारामा खडानन्द अधिकारी, गोरखामा धर्मेन्द्रकुमार मिश्र, दोलखामा रेखा कँडेल, पर्वतमा गंगाबहादुर क्षेत्री र रौतहटमा लक्ष्मीप्रसाद पौडेललाई नयाँ प्रमुख जिल्ला अधिकारीका रूपमा पठाइएको छ।

यसैगरी, सहसचिव ऋषिराम तिवारीलाई लागूऔषध नियन्त्रण विभागको महानिर्देशकमा सरुवा गरिएको छ। रौतहटका पूर्वसिडिओ दिनेशसागर भुसाल, गोरखाका तुलसीबहादुर श्रेष्ठ र दोलखाका हरिप्रसाद घिमिरेलाई भने गृह मन्त्रालय तथा मातहतमा फिर्ता बोलाइएको मन्त्रालयले जनाएको छ।

उपसचिवहरूको पनि जिम्मेवारी हेरफेर

गृह मन्त्रालयले उपसचिवहरूको सरुवा गर्दै विभिन्न जिल्लामा नयाँ सिडिओ खटाएको छ। जसअनुसार भोजपुरमा कुलेश्वर अर्याल, जाजरकोटमा नवराज बराल, खोटाङमा महेशकुमार गुरुङ, सल्यानमा बन्दना केसी र म्याग्दीमा गणेश गैरेलाई प्रमुख जिल्ला अधिकारीको जिम्मेवारी तोकिएको छ।

यस्तै, उपसचिव बेदराज फुयाँललाई डडेल्धुराको प्रमुख जिल्ला अधिकारी बनाइएको छ भने अमरबहादुर वलीलाई बाँकेको सहायक प्रमुख जिल्ला अधिकारी (सहायक सिडिओ) को जिम्मेवारी दिई पठाइएको छ। गृह प्रशासनलाई थप सुदृढ र प्रभावकारी बनाउन यो कार्यविभाजन गरिएको मन्त्रालय स्रोतले जनाएको छ।

प्रकाशित मिति: शुक्रबार, भदौ १९, २०८३ २१:१७

प्रतिक्रिया दिनुहोस्