एनपीएलः सुदूरपश्चिमको शानदार पुनरागमन, पोखरा ६ विकेटले पराजित

काठमाडौं । कप्तान दीपेन्द्रसिंह ऐरीले ब्याटिङ र बलिङ दुवैमा प्रभावशाली प्रदर्शन गरेपछि सुदूरपश्चिम रोयल्सले नेपाल प्रिमियर लिग (एनपीएल) क्रिकेटमा पहिलो जित दर्ता गरेको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा बुधबार भएको प्रतियोगिताको चौथो खेलमा सुदूरपश्चिमले पोखरा एभेन्जर्सलाई ६ विकेटले पराजित गरेको हो ।
पोखराले प्रस्तुत गरेको १४६ रनको लक्ष्य सुदूरपश्चिमले १६.५ ओभरमा चार विकेट गुमाएर पूरा ग¥यो । जितका लागि १९ बल बाँकी छँदै लक्ष्य भेट्टाएको सुदूरपश्चिमका कप्तान दीपेन्द्रले ३६ बलमा अविजित ५१ रन बनाए । उनले चार चौका र दुई छक्का प्रहार गरे । बलिङतर्फ पनि एक विकेट लिएका दीपेन्द्र खेलको उत्कृष्ट खेलाडी घोषित भए ।
सुदूरपश्चिमको जित सहज भने थिएन । टोलीले पहिलो ओभरमै विकेट गुमाएको थियो । धनञ्जय लक्षनको बलमा विनोद भण्डारी बोल्ड भएपछि सुदूरपश्चिम दबाबमा परेको थियो । भण्डारीले दुई बलमा एक चौकासहित चार रन बनाएका थिए । पहिलो ओभरको पाँचौँ बलमा विकेट गुमाएपछि क्रिजमा आएका ब्रान्डन म्याकमुलेनले आक्रामक ब्याटिङ गर्दै टोलीको रन गति बढाए ।
म्याकमुलेनले १२ बलमा दुई चौका र एक छक्कासहित २२ रन बनाए । उनको आक्रामक ब्याटिङले सुदूरपश्चिमलाई सुरुआती झट्काबाट उकास्ने संकेत देखिए पनि चौथो ओभरमा शकिब अल हसनले उनलाई एलबीडब्लू आउट गरे । त्यसपछि सैफ जैब र दीपेन्द्रले इनिङ्स अघि बढाए ।
जैबले १६ बलमा १५ रन बनाए । तर, छैटौँ ओभरमा उनी रनआउट भएपछि सुदूरपश्चिमले ५१ रन बनाउँदा तीन विकेट गुमाइसकेको थियो । यस्तो अवस्थामा कप्तान दीपेन्द्र र ईशान पाण्डेले जिम्मेवारीपूर्ण ब्याटिङ गर्दै टोलीलाई सम्हाले ।
दीपेन्द्रले एकातिर विकेट जोगाउँदै रन बटुले भने ईशानले पनि उनलाई राम्रो साथ दिए । दुवैले चौथो विकेटका लागि ७४ रनको साझेदारी गरेपछि सुदूरपश्चिम जितको नजिक पुगेको थियो । ईशानले ३१ बलमा दुई चौका र दुई छक्कासहित ३७ रन बनाए । उनले ११९.३५ को स्ट्राइक रेटमा ब्याटिङ गरेका थिए । मेहदी हसनले १६औँ ओभरअघि उनलाई एलबीडब्लू आउट गर्दै पोखरालाई खेलमा फर्काउने प्रयास गरे ।
तर, त्यसबेलासम्म सुदूरपश्चिमको जितको आधार तयार भइसकेको थियो । क्रिजमा रहेका दीपेन्द्रलाई शर्फेन रदरफोर्डले साथ दिए । रदरफोर्डले तीन बलमा एक छक्कासहित सात रन बनाए । १७औँ ओभरको पाँचौँ बलमा दीपेन्द्रले कुशल भुर्तेललाई छक्का प्रहार गरेपछि सुदूरपश्चिमले १९ बल बाँकी छँदै लक्ष्य पूरा ग¥यो ।
यसअघि टस हारेर पहिले ब्याटिङ गरेको पोखराले निर्धारित २० ओभरमा सात विकेट गुमाएर १४५ रन बनाएको थियो । पोखराका लागि अर्जुन घर्तीले अविजित ४० रन बनाए । उनले २५ बलको सामना गर्दै चार चौका र एक छक्का प्रहार गरे । मध्यक्रममा मेहदी हसनले ३२ रन बनाएर टोलीको स्कोर बढाउन योगदान दिए । कप्तान कुशल भुर्तेलले २१ तथा शकिब अल हसनले १४ रन जोडे ।
पोखराले सुरुआतदेखि नै तीव्र गतिमा रन बनाउन सकेन । सुदूरपश्चिमका बलरहरूले नियमित अन्तरालमा विकेट लिँदा पोखरा ठूलो स्कोर बनाउनबाट रोकियो । धनञ्जय लक्षनले विनोद भण्डारीलाई आउट गर्दै सुदूरपश्चिमलाई पहिलो सफलता दिलाएका थिए । त्यसपछि शकिब अल हसनले म्याकमुलेन र अनिल खरेलले महत्त्वपूर्ण विकेट लिएर पोखराको इनिङ्समा दबाब कायम राखे ।
सुदूरपश्चिमका अनिल खरेल सबैभन्दा सफल बलर बने । उनले तीन ओभरमा २३ रन खर्चेर तीन विकेट लिए । धनञ्जय लक्षनले दुई विकेट हात पारे भने कप्तान दीपेन्द्र र हेमन्त धामीले एक–एक विकेट लिए । दीपेन्द्रले चार ओभरमा २१ रन खर्चेर एक विकेट लिएका थिए ।
पोखराले बनाएको १४५ रन प्रतिस्पर्धात्मक लक्ष्य भए पनि सुदूरपश्चिमका ब्याटरहरूले आवश्यक रन गति कायम राखे । विशेषगरी दीपेन्द्र र ईशानको साझेदारीले खेलको दिशा बदल्यो । सुरुआती तीन विकेट गुमाएर दबाबमा परेको टोलीलाई कप्तानले सम्हाल्दै जितसम्म पु¥याए ।
यस जितसँगै सुदूरपश्चिमले प्रतियोगितामा पहिलो सफलता हात पारेको छ । यसअघि टोलीले आफ्नो पहिलो खेलमा लुम्बिनी लायन्ससँग सात विकेटको हार बेहोरेको थियो । उता पोखराले भने प्रतियोगिताको पहिलो खेलमै पराजय भोगेको छ ।