रुबिनको साथमा आर्क्स फुड र सोमपाल कामी

काठमाडौं । आर्क्स फुड र नेपाली राष्ट्रिय क्रिकेटर सोमपाल कामीले नेपालका उत्कृष्ट टेबल टेनिस खेलाडी रुबिन महर्जनलाई अन्तर्राष्ट्रिय प्रतियोगितामा सहभागी गराउन सहकार्य गरेका छन् । विश्व वरियतामा ५२७औं स्थानमा रहेका महर्जनलाई अन्तर्राष्ट्रिय स्तरको प्रतिस्पर्धामा पुग्न आवश्यक सहयोग उपलब्ध गराउँदै नेपाली खेल प्रतिभालाई विश्वमञ्चमा चिनाउने उद्देश्यले यो पहल सुरु गरिएको हो ।

सहकार्यअन्तर्गत आर्क्स फुडले महर्जनको तालिम, यात्रा र प्रतियोगितामा आवश्यक सहयोग प्रदान गर्ने जनाएको छ । कम्पनीका प्रतिनिधिहरूले खेलकुद क्षेत्रको विकास र नेपाली खेलाडीलाई अन्तर्राष्ट्रिय पहिचान दिलाउन निजी क्षेत्रको भूमिका अझ प्रभावकारी बनाउने लक्ष्य रहेको बताएका छन् ।

राष्ट्रिय क्रिकेटर सोमपाल कामीले खेलाडीहरूको करियर निर्माणमा यस्ता सहकार्य अत्यन्त महत्वपूर्ण हुने उल्लेख गर्दै भने, ‘नेपालमा प्रतिभा धेरै छन्, तर अवसर र सहयोगको अभावले धेरै खेलाडी अघि बढ्न सकिरहेका छैनन् । रुबिनजस्ता खेलाडीलाई अन्तर्राष्ट्रियस्तरमा पुर्‍याउन सहयोग गर्नु हाम्रो कर्तव्य हो ।’

महर्जनले सहयोगप्रति आभार व्यक्त गर्दै अन्तर्राष्ट्रिय प्रतियोगितामा उत्कृष्ट प्रदर्शन गरी नेपालको नाम उज्यालो बनाउने प्रतिबद्धता जनाए । ‘यो समर्थनले मेरो आत्मविश्वास बढाएको छ । देशको प्रतिनिधित्व गर्दै अझ राम्रो नतिजा ल्याउने प्रयास गर्नेछु,’ उनले भने ।