काठमाडौँ महानगरले आजदेखि रात्रिकालीन बस सञ्चालन गर्दै, कस्तो छ रुट ?

काठमाडौं । काठमाडौं महानगरपालिकाले वैशाख १ गतेदेखि रात्रिकालीन सार्वजनिक यातायात सञ्चालन गर्ने भएको छ। बेलुका ८ बजेदेखि राति ११ बजेसम्म बसहरू सञ्चालन हुने महानगरले जनाएको छ।
ललितपुरको लगनखेल, पाटन अस्पताल, अल्का, नर्भिक, प्रसुति गृह, ट्रमा सेन्टर, वीर अस्पताल, कान्ति अस्पताल, टिचिङ् अस्पताल, गंगालाल हृदय केन्द्र हुँदै बुढानीलकण्ठसम्म एउटा रुट हुने महानगरले जनाएको छ। उत्तर दक्षिणको यो १६ किलोमिटरको एकतर्फी रुट हो।
थानकोटदेखि सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तरराष्ट्रिय विमानस्थलसम्म पूर्व पश्चिम दिशाको एकतर्फी दुरी २० किलोमिटरको हो। यी दुई रुटमा ४ वटा रात्रिकालीन विद्युतीय बस सञ्चालन हुनेछन्। महानगरले साझा यातायातसँगको सहकार्यमा नयाँ वर्षदेखि सुरू गर्न लागेको हो।
बेलुका सार्वजनिक यातायात सञ्चालन नहुँदा महङ्गो यात्रा गर्नुपर्ने भएकोले रात्रिकालीन सार्वजनिक यातायात सेवा सुरू गर्न लागेको महानगरले जनाएको छ। सेवालाई अत्याधुनिक,एकीकृत, सहज,सुरक्षित र भरपर्दो दिगो प्रणाली बनाउने लक्ष्य महानगरको रहेको छ ।

तोकिएको रुटका बस स्टपहरुमा हरेक २० मिनेटको अन्तरमा बस आउनेछन्। बसमा सीसीटीभी क्यामरा जडान हुनेछन्। सुरक्षाका लागि नगर प्रहरी हुने महानगरले जनाएको छ ।