उपत्यकामा रात्रिकालीन बससेवा सुरु

काठमाडौं । काठमाडौं उपत्यकामा मंगलबारदेखि रात्रिकालीन बससेवा सञ्चालन सुरु भएको छ । काठमाडौं महानगरपालिका र साझा यातायातको सहकार्यमा साँझ ७ बजेदेखि पुल्चोकबाट बससेवा सुरु भएको हो । सेवा सुरु गर्दा कामपाको कार्यवाहक प्रमुख सुनिता डंगोल र ललितपुर महानगरपालिका प्रमुख चिरीबाबु महर्जन सहभागी भएका छन् ।  
पहिलो चरणमा लगनखेलबाट, बूढानीलकण्ठसम्म, बूढानीलकण्ठबाट, लगनखेलसम्म, थानकोटदेखि एयरपोर्टसम्म र एयरपोर्टबाट थानकोटसम्मको रुटमा विद्युतीय बससेवा सुरु गरिएको हो । 
ललितपुरको लगनखेल, पाटन अस्पताल, अल्का, नर्भिक, प्रसूतिगृह, ट्रमा सेन्टर, वीर अस्पताल, कान्ति अस्पताल, टिचिङ अस्पताल, गंगालाल हृदय केन्द्र हुँदै बूढानीलकण्ठसम्म एउटा रुट हुनेछ । उत्तरदक्षिणतर्फ पर्ने यो १६ किलोमिटरको एकतर्फी रुट हुने कामपाले  जनाएको छ ।
थानकोटबाट सतुंगल, कलंकी, कालीमाटी, त्रिपुरेश्वर, थापाथली, माइतीघर मण्डला, बानेश्वर, मीनभवन, तीनकुने हुँदै अन्तर्राष्ट्रिय विमानस्थलसम्म पूर्वपश्चिम दिशाको एकतर्फी दूरी २० किलोमिटरको हो । यी दुई रुटमा चार वटा रात्रिकालीन विद्युतीय बस सञ्चालन हुने महानगरले जानकारी दिएको छ । यो सार्वजनिक यातायातको सेवा दैनिक बेलुकी ८ देखि ११ बजेसम्म पाइने जनाइएको छ ।
तोकिएको रुटका बसस्टपबाट हरेक २० मिनेटको अन्तरमा बस आउनेछन् । बसमा सिसिटिभी क्यामरा जडान हुनेछन् भने सुरक्षाका लागि नगरप्रहरी खटिनेछन् ।