फेरि बढ्यो पेट्रोलियम पदार्थको मूल्य, डिजेल र मट्टितेलमा प्रतिलिटर ३० रुपैयाँ वृद्धि

काठमाडौं । नेपाल आयल निगमले पेट्रोलियम पदार्थको मूल्य फेरि बढाएको छ । निगमले डिजेल र मट्टीतेलको मूल्य ३० रुपैयाँ बढाएको हो । निगमले बुधबार जारी गरेको सूचनामा  डिजेल र मट्टितेलको मूल्य बढेको जानकारी दिएको हो ।

योसँगै काठमाडौं, पोखरा, दिपायलमा डिजेलको मूल्य बुधबार मध्य रातिबाट प्रतिलिटर २३७ रुपैयाँ पुगेको छ।

मूल्य समायोजनपश्चात समेत डिजेलमा प्रतिलिटर ९९.१६ रुपैंयाले अझै घाटा हुने निगमले जनाएको छ। निगमले आन्तरिकतर्फको हवाई इन्धनको मूल्य पनि प्रतिलिटर ५ रुपैयाँले बढाएको छ।

पेट्रोलको मूल्य भने यथावत् राखिएको छ। मध्यपूर्वमा जारी रहेको युद्धका कारण अन्तर्राष्ट्रिय बजारमा पेट्रोलियम पदार्थको निरन्तर मूल्यवृद्धि भइरहेको विज्ञप्तिमा जनाइएको छ ।

पेट्रोलियम पदार्थको लागत मूल्य बढी र बिक्री मूल्य कम भएको कारणले मूल्य समायोजन गर्दा समेत पेट्रोलमा प्रतिलिटर रु. २.३२, डिजेलमा प्रतिलिटर रु. ८७.९९, मट्टितेलमा रु. ३६.७० र एल.पी. ग्यासमा प्रतिसिलिण्डर रु. ३३१.२५ घाटा कायम नै रही १५ दिनमा करिब ७ अर्ब ८१ करोड ६१ लाख घाटा भएको विज्ञप्तिमा छ ।

मूल्यवृद्धि निरन्तर भएपछि सरकारले केही दिनअगाडि सार्वजनिक सवारी साधनको भाडा वृद्धि गरेको थियो।  व्यवसायीहरूका अनुसार ढुवानी खर्च ह्वात्तै बढ्ने भएकाले तरकारी, खाद्यान्न, निर्माण सामग्रीलगायतका वस्तुको मूल्य फेरि बढ्ने देखिन्छ ।