भाइकाजीविरुद्ध दुई मुद्दा

काठमाडौं । अख्तियार दुरुपयोग अनुसन्धान आयोगले काठमाडौँ उपत्यका विकास प्राधिकरणका तत्कालीन विकास आयुक्त भाइकाजी तिवारीविरुद्ध गैरकानुनी सम्पत्ति आर्जनसहित दुईवटा भ्रष्टाचार मुद्दा दायर गर्दै १० करोडभन्दा बढी बिगो दाबी गरेको छ।
गैरकानुनी रूपमा सम्पत्ति आर्जन गरी भ्रष्टाचार गरेको आरोपमा आयोगले बिहीबार विशेष अदालत काठमाडौँमा मुद्दा दायर गर्दै तिवारीविरुद्ध १० करोड ५४ लाख ९५ हजार ८ सय ७१ रुपैयाँ बिगो कायम गरेको छ । आयोगले तिवारीले सार्वजनिक पदधारण गरेको अवधि २०४४ भदौ १९ गतेदेखि काठमाडौँ उपत्यका विकास प्राधिकरणको आयुक्त भएको मिति २०७८ वैशाख १ गतेसम्मको अवधिमा आम्दानी गरेको र खर्चको विवरणको हिसाब गरेको थियो ।
सो क्रममा तिवारीले विभिन्न स्रोतबाट १४ करोड ५१ लाख ९१ हजार रुपियाँ वैधानिक आम्दानी गरेको देखिएको थियो तर आयोगको अनुसन्धानका क्रममा तिवारीको आम्दानी २५ करोड छ लाख ८७ हजार रुपियाँ देखिएको छ । आम्दानी र खर्च तथा लगानी अनुपातको हिसाब गर्दा १० करोड ५४ लाख पन्चानब्बे हजार रुपियाँको स्रोत पुष्टि नभएको देखिएको छ ।
आयोगले तिवारीलाई सोही रकम बराबर बिगो कायम गरी भ्रष्टाचार निवारण ऐन अनुसार कारबाहीको माग गरेको छ । यसैगरी अख्तियार दुरुपयोग अनुसन्धान आयोगले तिवारी र तत्कालीन शाखा अधिकृत यामकुमार कार्कीविरुद्ध अर्को भ्रष्टाचार मुद्दा दायर गरेको छ । सरकारी तथा सार्वजनिक संस्थाको लिखत, छापलगायत दुरुपयोग गरी भ्रष्टाचार गरेको आरोपमा शुक्रबार विशेष अदालत काठमाडौँमा मुद्दा दायर भएको हो । तिवारीविरुद्ध दायर भएको यो दोस्रो भ्रष्टाचार मुद्दा हो । बिहीबार मात्रै आयोगले उनीविरुद्ध साढे १० करोड रुपियाँ बिगो राखेर गैरकानुनी सम्पत्ति आर्जनसम्बन्धी पहिलो मुद्दा दायर गरेको थियो । आयोगका प्रवक्ता सुरेश न्यौपानेका अनुसार प्रतिवादी दुवैलाई भ्रष्टाचार निवारण ऐन अनुसार कारबाही माग गरिएको छ ।