‘सञ्चार माध्यमलाई टिकाइराख्न न्यूज एजेन्सीको भूमिका महत्वपूर्ण’

काठमाडौं । नेपालमा न्यूज एजेन्सीहरुको भूमिका र महŒव बढ्दै गएको वक्ताहरुले धारणा राखेका छन् । नेपाल न्यूज बैंक समाचार एजेन्सीले काठमाडौंमा आयोजना गरेको ‘समाचार संवाद’ कार्यक्रममा संचार सम्बद्ध व्यक्तिहरुले न्यूज एजेन्सीको सान्दर्भिकता बढ्दै गएको औंल्याएका हुन् । 
राष्ट्रपति रामचन्द्र पौडेलका प्रेस सल्लाहकार किरण पोखरेलले आर्थिक तथा अन्य विभिन्न चुनौतीका कारण सञ्चारमाध्यमलाई टिकाइराख्न कठिन हुँदै गइरहेको अवस्थामा समाचार एजेन्सीहरुको महŒव बढेको बताए ।
कार्यक्रममा बागमती प्रदेशका सञ्चार रजिस्ट्रार रेवतीप्रसाद सापकोटाले समाचार एजेन्सीका सेवाग्राहीले ब्रेकिङ न्यूजसँगै विकासोन्मुख समाचारबारे अग्रिम जानकारीसमेत अपेक्षा गर्ने बताए । रजिष्ट्रार सापकोटाले न्यूज एजेन्सीहरुले समाचार स्रोत र विश्वसनीयता कायम राख्न सक्नु पर्ने बताए । 
कार्यक्रममा न्यूज२४ दैनिकका प्रधान सम्पादक नवराज चालिसेले मूलधारका संचार माध्यमहरुलाई समाचार स्रोतको रुपमा न्यूज एजेन्सीको भूमिका सहयोगी हुने बताए । संचार माध्यमहरुको उद्देश्य र भूमिका स्पष्ट हुनु पर्नेमा जोड दिँदै उनले निजी लगानीको संचालनमा रहेको न्यूज एजेन्सीहरु समाचारको दायरालाई फराकिलो बनाउन आग्रह गरे । 
कुनै समाचारको विषयमा के भइरहेको छ र त्यसले कस्तो रूप लिन सक्छ भन्नेबारे एजेन्सीले समयमै जानकारी गराउन सके संचारमाध्यमका समाचार कक्षलाई योजना बनाउन र समाचारको तयारी गर्न सहज हुने उनको भनाइ थियो ।
त्यस्तै, नेपाल पत्रकार महासंघका महासचिव रामप्रसाद दाहालले नेपाल न्यूज बैंकले अन्तर्राष्ट्रिय स्तरको समाचार एजेन्सीका रूपमा विकास हुने लक्ष्य राख्नु सकारात्मक भएको बताए । उनले अन्तर्राष्ट्रिय समाचार एजेन्सी पीटीआई र रोयटर्सजस्तै स्तरमा पुग्ने परिकल्पनासहित अघि बढ्नु जरुरी रहेको उल्लेख गरे ।
नेपाल न्यूज बैंक प्रालिकी अध्यक्ष कमला सापकोटाको अध्यक्षतामा भएको कार्यक्रममा प्रमुख सम्पादक सल्लाहकार धर्मेद्र झा र सम्पादक युवराज गौतमले सहजीकरण गरेका थिए ।