सुकुम्वासी बस्ती उठाएर मनोहरा किनार मैदान

काठमाडौं । सरकारले दुई दिन लगाएर मनोहरा खोला किनारको सुकुम्बासी बस्ती खाली गराएको छ । उपत्यकाका विभिन्न खोला किनारामा रहेका सुकुम्वासी बस्ती हटाउने सुरु गरेको सरकारले मध्यपुर थिमि–१ लोकन्थली र जडीबुटीस्थित मनोहरा खोला किनारामा बसोबास गर्दै आएका सुकुम्वासी बस्तीका पाँच सयभन्दा बढी घरटहरा भत्काएको हो । 
भक्तपुरका प्रहरी उपरीक्षक सूर्यबहादुर खड्काका अनुसार २४ वटा एस्काभेटर प्रयोग गरेर खोला किनारका एक सामुदायिक विद्यालयसहितका सबै संरचना हटाइएको हो । आइतबार र सोमबार दुई दिन लगाउर मनोहरा किनार खाली गराइएको हो । यसका लागि नेपाल प्रहरी र सशस्त्र प्रहरीलाई ठूलो संख्यामा परिचालन गरिएको थियो । 
यसैबीच काठमाडौं महानगरपालिकाकी कार्यवाहक प्रमुख सुनिता डंगोलले थापाथलीस्थित वागमती नदी किनारामा खाली गराइएको स्थानको निरीक्षण गरेकी छन् । खाली गराइएका सार्वजनिक जग्गाको संरक्षणका लागि तत्काल तारबार लगाउन र अधिकार सम्पन्न वागमती सभ्यता एकीकृत विकास समितिसँग समन्वय गर्न उनले निर्देशन दिएकी छन् । थापाथली र वंशीघाट क्षेत्रमा रहेका ३३२ घरटहरामध्ये थापाथलीतर्फका १३६ संरचना भत्काइएको छ भने सिनामंगलदेखि वानेश्वर क्याम्पससम्मको क्षेत्रमा रहेका १६२ घरधुरी पनि खाली गराइएको छ ।
अधिकार सम्पन्न बागमती सभ्यता एकीकृत विकास समितिले २०७९ सालमा तयार पारेको प्रतिवेदनअनुसार उपत्यकाका नदी किनारमा ३ हजार ४९६ घरधुरी अव्यवस्थित बसोबासी रहेको तथ्यांकमा छ । यसमध्ये काठमाडौं महानगरमा २ हजार २४५, भक्तपुरमा ७७३, बुढानीलकण्ठमा १५६, कागेश्वरीमा ९० र ललितपुरमा १७ घरधुरी थिए । पछिल्लो तीन वर्षमा यी संरचनाहरू थपिएर हाल उपत्यकामा झन्डै चार हजार अव्यवस्थित बसोबासी रहेको अनुमान गरिएको थियो । प्रशासनले अब बाँकी रहेका स्थानहरूमा पनि क्रमशः बस्ती खाली गराउने र सार्वजनिक जग्गा संरक्षण गर्ने योजना बनाएको छ ।