निर्माणाधीन फोहोर प्रशोधन केन्द्रविरुद्ध रिट

काठमाडौं । थापाथली क्षेत्रमा फोहोरमैला संकलन तथा प्रशोधन केन्द्र निर्माणको विषयलाई लिएर विवाद चुलिँदै गएसँगै थापाथली विकास मञ्चका तर्फबाट उक्त केन्द्रको निर्माण रोक्न माग गर्दै सर्वोच्च अदालतमा रिट निवेदन दायर गरिएको छ ।
रिट निवेदनमा काठमाडौँ महानगरपालिका, वडा नम्बर ११ कार्यालयलगायत, वन तथा वातावरण मन्त्रालय, स्वास्थ्य मन्त्रालय, बागमती एकीकृत विकास समिति, संघीय मामिला तथा सामान्य प्रशासन मन्त्रालय र शहरी विकास मन्त्रालयलाई विपक्षी बनाइएको छ । 
निवेदनमा थापाथलीस्थित बागमती कोरिडोरको करीब ५ रोपनी सार्वजनिक जग्गामा फोहोर संकलन, प्रशोधन तथा स्थानान्तरण केन्द्र निर्माण गर्न लागिएको उल्लेख छ । रिट निवेदनमार्फत उक्त स्थानमा फोहोर प्रशोधन वा स्थानान्तरण केन्द्र निर्माण नगर्न तथा भइरहेको निर्माण कार्य तत्काल रोक्न परमादेश जारी गर्न माग गरिएको छ । साथै अन्तिम फैसला नभएसम्म निर्माण कार्य यथास्थितिमा राख्न अन्तरिम आदेश जारी गर्न पनि आग्रह गरिएको छ ।
रिट निवेदनअनुसार प्रस्तावित स्थान घना बस्ती, अस्पताल तथा विद्यालय नजिकै रहेकाले यसले जनस्वास्थ्यमा गम्भीर असर पार्ने जोखिम छ । विशेषगरी प्रसूति गृह अस्पतालसँगै फोहोर प्रशोधन केन्द्र सञ्चालन हुँदा नवजात शिशु, विरामी तथा सर्वसाधारणमा प्रत्यक्ष असर पर्ने चिन्ता व्यक्त गरिएको छ ।
रिटमा उल्लेख भएअनुसार उक्त क्षेत्रमा दैनिक ठूलो परिमाणमा फोहोर संकलन हुने, सयौं सवारीसाधनको आवतजावत बढ्ने तथा दुर्गन्ध र प्रदूषण फैलिने खतरा छ । यसले स्थानीय बासिन्दाको स्वच्छ वातावरणमा बाँच्न पाउने संवैधानिक हक हनन हुने दाबी गरिएको छ । निवेदकले वातावरणीय प्रभाव मूल्यांकन, स्थानीयसँग परामर्श र सार्वजनिक सुनुवाइसमेत नगरी परियोजना अघि बढाइएको आरोप लगाएका छन् । यस्तो कार्य वातावरण संरक्षण ऐन, फोहोरमैला व्यवस्थापन ऐन तथा स्थानीय सरकार सञ्चालन ऐनविपरीत रहेको जिकीर गरिएको छ ।