विमानस्थल डेढ घण्टा अवरुद्ध

काठमाडौं । त्रिभुवन अन्तर्राष्ट्रिय विमानस्थल सोमबार बिहान डेढ घण्टा अवरुद्ध रह्यो । अवतरणका क्रममा टर्किस एयरलाइन्सको एयरबस ३३० जहाजको चक्कामा आगो लागेपछि सुरक्षालाई ध्यानमा राख्दै विमानस्थल बन्द गरिएको थियो । जहाज अवतरणसँगै यात्रु सकुशल ओर्लिए, आगो निभाइयो, त्यसपछि विमानस्थल नियमित भएको हो । 
टर्कीको इस्तानबुलबाट आएको टीके ७२६ नम्बरको विमानको अवतरण गर्ने क्रममा चक्कामा आगो लागेको थियो । विमानस्थलका महाप्रबन्धक टेकनाथ सिटौलाका अनुसार बिहान ६ः४५ बजेदेखि बन्द भएको विमानस्थल करिब डेढ घण्टापछि सञ्चालनमा आएको थियो । स्थिति सामान्य भएपछि बिहान ८ः३० बजे एयर इन्डिया र ८ः३५ बजे फ्लाइ दुबईका जहाज अवतरण गरेका थिए । विमानस्थल सुरक्षा कार्यालयका प्रहरी उपरीक्षक राजकुमार सिलवालका अनुसार टर्किस एयरलाइन्सको जहाजको चक्कामा लागेको आगो दमकलको सहायतामा निभाइएको थियो । विमानलाई रनवेमै रोकेर आपतकालीनद्वारबाट यात्रुहरुको उद्धार गरिएको थियो । विमानमा २७३ यात्रु र ११ जना चालक दलका सदस्य थिए । सबै सकुशल रहे, कुनै दुर्घटना हुन पाएन ।