सशस्त्र प्रहरीका दुई महिला आरोहीको बढुवा

काठमाडौं । सर्वाेच्च शिखर सगरमाथा तथा लोत्से हिमाल आरोही सशस्त्र प्रहरी सहायक निरीक्षक निम दिक्की शेर्पा र सगरमाथा आरोही सहायक हवल्दार अनिता कार्कीलाई एक तह बढुवा गरिने भएको छ ।
शेर्पालाई तत्काल बढुवा प्रक्रिया अगाडि बढाइएको छ भने कार्कीलाई हालको दर्जाको न्यूनतम अवधि पुगेपछि हवल्दारमा बढुवा गरिने भएको सशस्त्रका केन्द्रीय प्रवक्ता प्रहरी नायब महानिरीक्षक विष्णुप्रसाद भट्टले जानकारी दिए ।
सशस्त्र प्रहरी महानिरीक्षक नारायणदत्त पौडेलले उक्त घोषणा गरेसँगै आवश्यक प्रक्रिया थालिएको पनि भट्टले बताए ।    सहायक हवल्दार  कार्कीले जेठ ३ गते बिहान १० बजेर २० मिनेटमा सगरमाथाको सफल आरोहण गरेकी थिइन् । सहायक निरीक्षक निम डिक्की शेर्पाले सोही दिन बिहान ११ बजेर ५५ मिनेटमा सगरमाथा र जेठ ४ गते दिउँसो ३ बजेर २५ मिनेटमा लोत्से हिमालको सफल आरोहण गरेकी थिइन । सशस्त्र प्रहरीका तर्फबाट सगरमाथा र लोत्से हिमाल आरोहण गर्ने शेर्पा र सगरमाथा आरोहण गर्ने कार्की पहिलो महिला आरोहीहरू हुन् । उनीहरुलाई एपीएफ सम्मानबाट सम्मान पनि गरिने भएको छ ।