दुई चिनियाँ नागरिक पक्राउ

काठमाडौं । शंकास्पद गतिविधिमा संलग्न अभियोगमा दुई चिनियाँ नागरिकलाई नक्सालबाट पक्राउ परेका छन् । पक्राउ पर्नेमा ३३ वर्षीय वाङ वेन्ड तथा ३२ वर्षीय चेन शुआन्गुई रहेको काठमाडौं उपत्यका अपराध अनुसन्धान कार्यालयका प्रवक्ता एसपी रामेश्वर कार्कीले बताए । दुवै पर्यटक भिसामा नेपाल आएकाहरु हुन् । नक्साल नारायणचौरमा आरआर बिल्डिङ एन्ट्रो टेक्नोलोजी नामक कार्यालय खोली अवैध रुपमा विदेशी मोडल तथा युवतीको लाइभ हब एपमार्फत अकाउन्ट खोल्ने, विदेशी र भारतीय नागरिकलाई साथी बनाई कुराकानी गरी पैसा माग्ने लगायतका शंकास्पद गतिविधि गर्ने गरेको खुलेपछि पक्राउ गरिएको प्रहरीले जनाएको छ । दुवैलाई अध्यागमन ऐनअन्तर्गतको कसुरमा थप अनुसन्धान तथा आवश्यक कारबाहीका लागि अध्यागमन विभाग कालिकास्थान पठाइएको छ ।