पूर्वअर्थमन्त्री पौडेल ७ दिन हिरासतमा

काठमाडौं । सम्पत्ति शुद्धीकरण कसुर अनुसन्धानका क्रममा पक्राउ परेका एमाले उपाध्यक्ष एवं पूर्वअर्थमन्त्री विष्णु पौडेल एक साता हिरासतमा रहने भएका छन् । सुर्खेतबाट सोमबार पक्राउ परेका उनलाई ७ दिन हिरासतमा राखेर अनुसन्धान गर्न विशेष अदालतले सम्पत्ति शुद्धीकरण अनुसन्धान विभागलाई म्याद दिएको हो । 
विशेष अदालतका न्यायाधीश नारायणप्रसाद पौडेल, न्यायाधीश हेमन्त रावल र न्यायाधीश उमेश कोइरालाको इजलासले मंगलबार हिरासत अनुमति दिएको हो । विभागले पौडेललाई सुर्खेतबाट नियन्त्रणमा लिएर मंगलबार नै काठमाडौं ल्याइपु¥याएको हो । पौडेलमाथि अनुसन्धानका लागि २० दिनको समय मागिएकोमा विशेष अदालतले जरूरी पक्राउ पुर्जी स्वीकृत गर्दै ७ दिनको मात्र म्याद थप गरेको हो । अदालतको आदेशलगत्तै पौडेललाई अनुसन्धान प्रक्रिया अघि बढाउनका लागि न्यायिक हिरासतमा पठाइएको छ । 
यसैबीच, विशेष अदालतमा पौडेलको म्याद थपका लागि गरिएको बहस सामाजिक सञ्जालमै प्रत्यक्ष प्रसारण गरिएको थियो । यसअघि सर्वोच्च अदालतमा केही राष्ट्रिय चासोका मुद्दामा सुनुवाइको प्रत्यक्ष प्रसारण गरिए पनि विशेष अदालतमा यो नयाँ सुरुवात हो । 
प्रधानन्यायाधीश डा. मनोजकुमार शर्माले संसदीय सुनुवाइका क्रममा सबै अदालतका इजलासहरूलाई प्रत्यक्ष प्रसारण गर्ने कार्ययोजना बताएका थिए । विशेष अदालतसँगै सोमबार जनकपुर उच्च अदालतमा भएको बहस पनि युट्युबमा लाइभ स्ट्रिमिङ गरिएको थियो ।
सर्वोच्च अदालतका प्रवक्ता सहरजिस्ट्रार अर्जुनप्रसाद कोइरालाले सर्वोच्चदेखि देशभरका अदालतमा बन्द इजलासबाहेकका बहस प्रत्यक्ष प्रसारण गर्ने कार्ययोजना रहेको बताए ।